Забележана планета со големина на Земјата која орбитира околу мала ѕвезда со животен век сто пати поголем од Сонцето
Астрономите открија нова планета со големина на Земјата која орбитира околу мала, студена ѕвезда која се очекува да сјае 100 пати подолго од Сонцето.
Препорачано
Карпестото тело, наречено Спекулус-3б, е оддалечено 55 светлосни години од Земјата и е откриено додека поминувало пред својата ѕвезда домаќин, ултра студено црвено џуџе кое е за половина помалку топло од сонцето и 100 пати помалку светло, пренесува Нејчр Астрономи.
Новооткриеното тело, опишано како „практично со иста големина како нашата планета“, се лула околу црвеното џуџе еднаш на секои 17 часа, што ја прави годината на планетата пократка од еден ден на Земјата, пишува Гардијан.
Но, додека на Спекулус-3б годините се кратки, деновите и ноќите немаат крај. „Веруваме дека планетата ротира синхроно, така што истата страна, наречена дневна страна, секогаш е свртена кон ѕвездата, исто како што прави Месечината за Земјата. Од друга страна, ноќната страна би била заклучена во бескрајна темнина“, вели Михаел Гилон, астроном од Универзитетот во Лиеж во Белгија и главен автор на студијата.
Тоа е само вториот планетарен систем што е откриен околу таква ѕвезда, по откривањето на седум карпести светови околу Трапист-1, уште една студена црвена џуџеста ѕвезда на 40 светлосни години од Земјата.
Истражувачите ја забележале планетата додека талкала низ лицето на нејзината ѕвезда, предизвикувајќи затемнување на ѕвездената светлина. Транзитот беше откриен од глобалната мрежа на роботски телескопи Спекулус.
Ултра ладните црвени џуџести ѕвезди сочинуваат околу 70% од ѕвездите во нашата галаксија и опстојуваат околу 100 милијарди години, што ги прави претенденти да бидат последните ѕвезди што сјаат во универзумот. Бидејќи тие се толку слаби и расфрлани по небото, астрономите мора да ги набљудуваат во текот на неколку недели за да откријат планети кои поминуваат пред нив.
Долгиот животен век на црвените џуџести ѕвезди значи дека планетите кои орбитираат околу нив може да бидат доволно топли доволно долго за да се појави живот. Но, во случајот на Спекулус-3б, секој живот би се соочил со исклучително сурова средина. Тесната орбита на планетата значи дека таа е бомбардирана со радијација, добивајќи речиси 16 пати повеќе енергија во секунда од Земјата.
„Во таква средина, присуството на атмосфера околу планетата е многу малку веројатно“, рече Џулиен де Вит, планетарен научник во МИТ и ко-директор на Северната опсерваторија Спекулос и нејзиниот телескоп Артемис.
