Европа со нетрпение ги очекува резултатите од изборите во Италија кои ќе се одржат на 25 септември. Моменталниот фаворит, лидерот на десничарите, Џорџиа Мелони му соопшти на Брисел дека ако таа победи, „забавата ќе заврши“, додека пак нејзиниот противкандидат, Енрико Лета смета дека нејзина победа би значела „крај за Италија“, пренесува ЕУрактив.

Говорејќи на плоштадот Пјаца Дуомо во Милано, лидерот на коалицијата Браќа на Италија, Мелони го започна говорот со „ако победам, за Европа, забавата заврши“.

Одговорот на лидерот на Демократската партија, Енрико Лета беше непосреден: „Тоа е вознемирувачка фраза. Доколку таа победи, се плашам дека ќе биде крај за Италија“.

Мелони ја предводи десничарската коалиција со Лигата на Матео Салвини и Форца Италија на Силвио Берлускони.

Нејзината коалиција води во сите анкети против левичарската коалиција на Енрико Лета предводена од Демократската партија.

Двајцата главни кандидати се судрија на вчерашната дебата организирана од Кориере дела Сера, на која и двајцата јасно ги кажаа своите политички линии во однос на Европа.

Мелони рече дека ЕУ треба да биде политички гигант, а не бирократски, да се занимава со „големите работи“ и да им ги остави на земјите-членки „прашањата што се најблиску до животот на граѓаните“.

Таа ја наведе како пример гасната криза, велејќи дека солидарноста во Европа е релативна.

„Германија не сака да стави ограничување на цената на гасот бидејќи има договори со руски Гаспром, а тоа не и одговара“, истакна Мелони.

„Не дозволувајте Брисел да го прави она за што Рим најдобро може да се грижи и не дозволувајте Рим сам да се грижи за она што не може сам да го реши“, рече Мелони.