„Фискалната консолидација останува приоритет на Владата и нема да отстапиме од она што е дефинирано со Фискалната стратегија. Кулминацијата ја достигнавме и сега ќе одиме кон намалување на јавниот долг“, вели министерката за финансии Гордана Димитриеска-Кочоска во врска со влијанието на реализацијата на новиот инвестициски план врз нивото на јавниот долг.

„Буџетскиот дефицит минатата година беше 4,4 проценти од БДП, Оваа година е 4 отсто. Јавниот долг во првиот квартал од 2025 година е најнизок во последните пет години и за првпат од 2018 година наваму бележи намалување во споредба со крајот на годината, односно, од 2018 година наваму нема година освен оваа во која јавниот долг во првиот квартал е помал отколку на крајот на годината“, рече таа во гостувањето во „360 Степени“ и додаде дека долгот во првиот квартал е намален за 36 милиони евра, нешто што не се случувало во минатиот период.

Димитриеска Кочоска вели дека има „внимателен пристап во работењето“ и дека тоа „ја покажува грижата кон Буџетот“.

„Можев и јас како во претходниот период. Се задолжувале во првиот квартал за да бидат спокојни до крајот на годината, а потоа граѓаните ги плаќале каматите. Можев и јас да ја задолжам државата 300-400 милиони евра и потоа да плаќаме камата од 7 проценти секој месец. Но, кој ќе одговара. Оваа министерка тоа нема да го дозволи. Тоа го покажуваат и податоците“, рече Димитриеска-Кочоска, реферирајќи на себе во трето лице.

Таа нагласи дека „задолжувањето е оправдано само ако има додадена вредност во економијата“.