Сончевата енергија беше главен извор на електрична енергија во Европската Унија за прв пат во историјата во јуни, со удел од 22 проценти од вкупното производство, надминувајќи ја нуклеарната енергија (21,6 проценти), енергијата на ветерот (15,8 проценти), хидроенергијата (14,1 процент) и природниот гас (13,8 проценти), објави денес Евростат.

Во вториот квартал од 2025 година, обновливите извори на енергија учествуваа со 54 проценти во нето производството на електрична енергија во Европската Унија, во споредба со 52,7 проценти во истиот период во 2024 година. Само сончевата енергија учествуваше со 19,9 проценти од енергетскиот микс.

Највисок удел на обновливи извори во производството на електрична енергија во вториот квартал од 2025 година имаше во Данска со 94,7 проценти, по што следуваат Латвија со 93,4 проценти, Австрија со 91,8 проценти, Хрватска со 89,5 проценти и Португалија со 85,6 проценти.

Спротивно на тоа, најниски удели на обновливи извори се забележани во Словачка со 19,9 проценти, Малта со 21,2 проценти и Чешка со 22,1 процент.

Во споредба со минатата година, 15 земји членки забележаа зголемување на уделот на обновливи извори во производството на електрична енергија, со најголемо зголемување во Луксембург (13,5%) и Белгија (9,1%), благодарение на растот на производството на сончева енергија.

Поголемиот дел од електричната енергија произведена од обновливи извори во вториот квартал од 2025 година доаѓа од сончева енергија (36,8%), енергија на ветерот (29,5%) и хидроенергија (26%), соопшти Евростат на својата веб-страница.