Кинеските автомобили се претежно познати по своите ниски цени, привлечна опрема и амбиција да го освојат светот на електричните возила. Но, една лимузина од Кина штотуку ги разби сите стереотипи. Имено, половното возило Хонгџи Гуоли Лантинг Јајун беше продадено во Обединетите Арапски Емирати за неверојатни 1,33 милиони евра. И не, не станува збор за хипер автомобил или супер автомобил, туку за кинеска лимузина што повеќе личи на државен автомобил од ерата на Мао Це Тунг отколку на нешто што би го очекувале во Дубаи.

Хнгџи (што на кинески значи „Црвено знаме“) со години произведува луксузни возила за политичката елита на Кина, а моделот ГЛЈ, некогаш познат како Л5, е најновиот огранок на таа линија. Долг е шест метри и е дизајниран како почит кон лимузините на комунистичкиот режим од 1960-тите, со ретро линии, минималистички хром и телескопско знаме кое се движи и се ориентира кон Северната Ѕвезда. Ова звучи театрално затоа што навистина е така, како и целиот автомобил. Но, зад таа театралност се крие нешто што досега не сме го виделе во светот на автомобилите, синтеза на кинеска уметност и ултралуксуз.

Кабината на овој Хонгчи е вистинско ремек-дело на културата, уметноста и трпението на мајсторите. Деталите се изработени со помош на техниката на лакирање без основа на Фуџоу, која вклучува 28 слоја природен лак, секој нанесен рачно, врз бисерна основа. Површините прикажуваат извадоци од „Лантингџи Сју“, позната кинеска калиграфска поема стара повеќе од 1500 години.

Не само што овие мотиви се врежани во ентериерот, туку можат да се проектираат и на инструмент таблата, а сцени од поемата се извезени и на потпирачите за грб, за што биле потребни 600 часа рачна работа од страна на двајца мајстори. Интересно е што возилото има нула километри, но технички е „користено“ бидејќи веќе било регистрирано, но само за да се олесни извозот од Кина. Купувачот е Станислав Семенов, бизнисмен од Емиратите, кој наводно платил околу 11 милиони јуани, или гореспоменатите 1,33 милиони евра, информира Каматица.