Откако „Слободен печат“ пред три дена информираше за откачената заштитна ограда на мостот „Гоце Делчев“ во центарот на Скопје, јавноста вознемирено реагираше на оваа сериозна опасност, а од Град Скопје како надлежен за овој проблем добивме одговор со кој како виновници за нереагирање ги посочија МВР, откаде се чека дозвола за почеток на санација на оваа ограда што долго време виси над градското шеталиште покрај реката Вардар.

ФОТО | Откачената ограда на мостот Гоце Делчев „виси“ над шеталиштето крај Вардар – Слободен печат

Денеска на мостот ништо не е променето – заштитната ограда сѐ уште е извадена од „шарки“ со што не претставува опасност само за илјадниците возачи кои со своите автомобили секојдневно минуваат оттаму, туку и за огромниот број граѓани кои пеш или со велосипеди постојано се движат на шеталиштето под мостот.

Со оглед на фактот дека шеталиштето води кон Градскиот парк, под мостот минуваат и млади луѓе, деца, заедно со своите родители, а некои од овие родители покрај Вардар минуваат и со бебиња во колички.

Од Град Скопје за „Слободен печат“ информираа дека оградата е првично оштетена во ноември минатата година, кога според нив, потоа е целосно обновена и санирана, но очигледно е повторно оштетена, но сега во многу поголеми размери.

– Во ноември 2024 година беа изведени активности за санирање на одбојната ограда на мостот „Гоце Делчев“ и таа беше доведена во првобитната состојба, но во меѓувреме е настанато повторно оштетување, од сообраќајни незгоди од движење со неприлагодена брзина за што се неопходни активности за санкционирање од страна на МВР – велат од Градот.

Според фотографиите на нашиот фотограф, само еден удар ја дели оваа ограда од целосен колапс, еден удар кој може да биде фатален за многу луѓе кои се наоѓаат во некое од возилата или оние кои безгрижно минуваат по градскиот кеј под мостот. Но очигледно никому од надлежните санирањето на состојбата на мостот не им е итна, ниту на тие што чекаат ниту на тие што треба да дадат дозвола.

Патем, од Град Скопје нагласија дека откако ќе добијат одобрение од МВР поправката ќе се изврши во денови на викенд поради солемиот сообраќаен метеж во текот на работните денови.

Проблемот опфаќа илјадници граѓани и неговиот епилог засега „виси“ исто како што виси откачената оградата. Граѓаните предупредуваат да не се чека да се случи некоја несреќа затоа што потоа залудни се сите инспекции и проверки. Дел од скопјани на социјалните мрежи укажуваат дека потребно е да се проверат сите мостови во Скопје, подземни премини, заштитни огради, скинати кабли што висат насекаде и серозно ја загрозуваат безбедноста на граѓаните.

Решението за овој проблем веројатно лежи некаде во бирократијата, загубено во лавиринтите кои од Град Скопје водат кон Министерството за внатрешни работи и обратно, бидејќи наместо итна реакција Градот чека дозвола од МВР да започне со реставрација на оваа ограда.

– Екипи од ЈП „Улици и патишта”-Скопје веќе се во подготовки за санација на одбојната ограда на мостот, за што се чека на согласност од МВР и безбедносните служби, а таа ќе биде извршена за време на викенд поради голем проток на сообраќај во текот на работната недела – информираат од Градот.

Ходниците низ кои патува надлежноста на локалната и централната власт во Македонија очигледно се толку долги и вмрежани, што им се губи и насоката и нивната цел – функционалност.

Што ќе се случи доколку градското претпријатие ЈП „Улици и патишта“ не добие согласност од надлежното министерство за почеток на реконструкцијата на оваа ограда, откачена од неколку столба и е близу до комплетен пад. Како што велат од Градот, безбедносните служби не даваат согласност за санација на оваа ограда, која директно ја загрозува безбедноста на граѓаните, однесување кое делува контрарадикторно.

Брзата реакција на надлежните не е потребна само во кризните состојби, од кои една од најголемите од нив ја доживуваме овие денови со трагичниот пожар во кочанската дискотека „Пулс“, туку функционалноста треба да биде дел од секојдневното живеење и за сите денови кои следат, која ќе го заштити народот од повторни трагедии. Одговор и реакција на проблемите на граѓаните со високо ниво на професионалност се сметаат за едни од најважните карактеристики кои треба да ги опишуваат Владата, општините и сите нивни институции, кои со својата работа и брзо реагирање ќе ја гарантираат безбедноста на сите граѓани и ќе ја намалат секојдневната опасност со која тие се соочуваат.