Ѓорѓе Балашевиќ во своите песни користел многу женски имиња, но само една ѝ е посветена на жената што ја сака, на неговата сопруга Оливера. Токму таа му била инспирација за истоимениот хит.

Момчило Бајагиќ Бајага стиховите од песната „Зажмури“ ѝ ги посветил на пејачката Алка Вујица, додека поетот Владо Дијак во 1949 година опеал една Селма, а таа песна станала еден од најголемите хитови на Балканот.

Селма Бориќ била студентка на која тој ѝ ги однел куферите до возот. Што се случило помеѓу нив останува тајна, но Дијак секако бил маѓепсан. Дека песната ѝ е посветена нејзе дознала дури во 1975 година и тогаш му пришла на Горан Бреговиќ по концертот на „Бјело дугме“ и му рекла: „Јас сум таа Селма“, пишува Тпортал.

Една Инес опеал Арсен Дедиќ. Токму неа, која го инспирирала во 1969 година и на која ѝ порачал: Не се давај, Инес, не им се давај на годините…, ја сретнал кога се лекувал во Падова и тоа по инсистирање на нејзините ќерки кои дознале дека токму нивната мајка го инспирирала Дедиќ да ја напише песната.

За една Милена веќе со години пејат многу генерации, но не знаат дека таа Милена е вистинска личност. За истоимената песна на „Нови фосили“ Рајко Дујмиќ го инспирирала медицинска сестра од Неготино, која ја запознал во Херцег Нови и која многу му се допаднала. И ветил дека ќе ѝ напише песна. Ја сретнал по две години на турнејата наречена „Милена, генерацијо“. Таа тогаш веќе била во брак и имала две деца, но не можела да скрие колку е воодушевена што Дујмиќ го одржал ветувањето и ѝ посветил песна.

И сопругата на Момчило Попадиќ од „Нови фосили“ била инспирација за еден од најголемите хитови на оваа група, а настанала во 3 часот наутро. Тонка не можела да изговори „р“, па нејзиниот сопруг ја задевал: „Тонка, речи море…“

За Тамара, еден од најголемите хитови на Борис Новковиќ, всушност пишувал неговиот долгогодишен пријател Бруно Ковачевиќ, а таа била неговата непрежалена љубов од средношколските денови. Тамара е денес во брак и има деца, но добро знае дека стиховите од песната се напишани за неа.