Идентификувани се и пронајдени се двајца тринаесетгодишници за кои постои сомнеж дека учествувале во праќање електронски пораки со заканувачка содржина дека има поставени бомби до образовните и други институции во Србија, јавуваат српските медиуми.

Поради тоа што сторителите се деца и не одговараат кривично, полицијата ја привела А.Б.С. (42), мајка на едно од момчињата, на која и е одредена мерката притвор до 48 часа, по што со кривична пријава ќе биде спроведена во Третото основно јавно обвинителство, додека триесет и осумгодишната мајка на второто момче ќе одговара во редовна постапка до Второто основно јавно обвинителство.

Едно од момчињата го посетува основното училиште „20. Октомври“ во Нов Белград, кое во претходниот период добиваше најголем број заканувачки мејлови, а само тој е осомничен дека испратил повеќе од 80 мејлови до неговот и други училишта.

Полициските службеници на Министерството за внатрешни работи, во соработка со Специјалното јавно обвинителство за високотехнолошки криминал на Вишото јавно обвинителство во Белград, продолжуваат со понатамошната работа со цел гонење на други лица поврзани со вакви закани.