Споменикот на Мајка Тереза, еден од недовршените остатоци од фамозниот проект „Скопје 2014“, со години стои недоправен со скелиња на него, ограден со лимени огради и обраснат со диво израснато зеленило. Официјално почна да се гради во 2015 година на парцела на улицата што води кон плоштадот, но набрзо неговата изградба запре и оттогаш до денеска очигледно никој не знае што да се направи со овој споменик, за којшто работната група формирана во времето на Владата на СДСМ утврди дека е дивоградба поради тоа што се прекршени повеќе закони.

Сепак, и покрај тоа што СДСМ пред доаѓањето на власт се закануваше дека ќе ги урне спомениците од проектот „Скопје 2014“, не само што за седум години тоа не се направи, туку и не го послушаа мислењето на експертите од работната група на чело со архитектот Мирослав Грчев. Имаше идеја да се догради и да се пренамени.

Претходната Влада реши да распише конкурс за идејно решение и да го догради, затоа што, како што беше соопштено, таа постапка ќе чинела поевтино отколку да се урива веќе изграденото. Ова предизвика бурни реакции во јавноста, па конкурсот ниту се распиша ниту некој повторно го спомена. И недовршениот споменик си остана недопрен на плоштадот.

Сега актуелната Влада на ВМРО-ДПМНЕ има намера да го доправи овој споменик, без да се прецизира кога тоа би се случило.

Сѐ што е оставено од објектите во недовршена фаза и е со уредна документација, ќе биде довршено. Објектот со скулптурална композиција, не е дивоградба и е со уредна документација и легално одобрение за градење – одговорија од Министерството за култура и туризам за „Слободен печат“ на прашањето што ќе преземе Министерството со недовршениот споменик на Мајка Тереза за кој се тврдеше дека е дивоградба.

Работната група што беше формирана во мандатот на СДСМ за да подготви анализа за реализацијата и последиците од проект „Скопје 2014“, во својот елаборат укажа дека со изградбата на споменикот е прекршен Уставот и повеќе закони. Најпрво, бидејќи станува збор за меморијален споменик, одлука за негова изградба не можела да донесе Владата туку Собранието, како што предвидува Законот за меморијални споменици. Владата немала надлежност ниту да ја утврдува локацијата на објектот, ниту неговиот изглед, затоа што тоа требало да го утврди Општина Центар.

Грчев: Одлуката на Владата, постаментот за споменикот на Мајка Тереза да биде пренамент е бесмислена

Изградбата на споменикот на Мајка Тереза требаше да се изгради како донација на фирмата „Сахара Индија“, сопственост на контроверзниот индиски бизнисмен Субрата Рој. Тој и Груевски во јануари 2013 го најавија проектот отворајќи ја спомен-плочата на Мајка Тереза на Плоштадот Македонија. Но, откако Рој заврши во затвор поради тоа што не платил оштета на измамени инвеститори во Индија, Владата на Груевски преку Министерството за култура и тогашната министерка Елизабета Канческа-Милевска го презеде проектот.
Тогаш, Министерството за култура склучи договор за изградба на споменикот со фирмата „Бетон“ во вредност од околу 5,6 милиони евра. Откако запре изградбата, „Бетон“ го тужеше Министерство за неисплатени средства според договорот со барање за обесштетување.

Од Министерството за култура и туризам побаравме одговор до каде е судската постапка и каков е исходот од неа.

Судските постапки, со оглед на тоа што „Бетон“ Скопје западна во стечај сѐ уште не се правосилно завршени – велат оттаму.

Со оглед на фактот дека вредноста за изградба на споменикот пред девет години беше проценета на 5,6 милиони евра, од Министерството велат дека сега сѐ уште немаат проценка колку би чинело завршувањето на споменикот и од каде би се обезбедиле тие средства.

Министерството за култура и туризам во овој момент нема процена колку би чинела доградбата на објектот имајќи предвид што пазарните услови од почетокот на градбата до денес се значително променети. Таква информација ќе се обезбеди во наредниот период – велат од Министерството.

Останува неизвесно каква ќе биде конечната судбина на споменикот за кој и Ватикан побара да се доизгради, како и тоа спомен-куќата на улица Македонија да биде управувана од Католичката црква. Барањето лично му било упатено на поранешниот претседател Стево Пендаровски при посетата на Ватикан на 24 Мај, на одбележувањето на Свети Кирил и Методиј.

Исто како што е неизвесно дали во мандатот на оваа Влада ќе се завршат и сите други недовршени објекти на плоштадот, но и фасадите на ЕВН и на „Пелагонија“, кои со години го грдеат изгледот на најцентралното градско подрачје.

Ватикан побарал од Пендаровски да се догради споменикот за Мајка Тереза на плоштадот