Во изминатиот период интензивно се работеше на уредување на локалитетот Крст во Кучково, за ѓорчепетровци да имаат убаво уредено катче каде што ќе можат да се рекреираат во текот на убавите сончеви денови и за време на викендите. Проектот кој, како што информира градоначалникот Александар Стојкоски, веќе е генерално финиширан и се работи на завршни детали, резултираше со масовна посетеност како од граѓаните на општина, така и од посетители од другите делови на Скопје.

Изминатите два викенди ова место го посетиле над 5000 луѓе, со што можеме да утврдиме дека е зголемена фреквенцијата на луѓе, а со тоа и фрлањето на отпадоци од храна и пијалоци е во зголемен обем. Ние како општина во изминатиот период поставивме корпи за отпадоци, како и два големи контејнери кои што служат за складирање на отпадот, но и покрај тоа сепак се забележува несовесно фрлен отпад и по зелените површини во околината – вели градоначалникот.

Стојкоски апелира до сите граѓани кои го посетуваат локалитетот да се однесуваат совесно и да го одлагаат отпадот на точно предвидените места за тоа, за да се задржи хигиената на локалитетот Крст – Кучково и околината на високо ниво и со тоа, како што вели Стојкоски, да се промовира во најубаво место за рекреација во општината.

Општина Ѓорче Петров во наредниот период ќе работи на доуредување на локалитетот и на поставување нови помали корпи секаде каде што циркулира поголема маса на посетители.