Наместо во Хрватска и на Медитеранот, сè повеќе Чеси одат во Полска за летните одмори. Не само што Хрватска е премногу скапа за нив, туку и климата на Балтичкото Море им е попријатна. Речиси еден век, „Чешкото Море“ беше во Хрватска. Повеќето туристи од земјата со единаесет милиони жители што нема свои плажи одеа таму. Но, во меѓувреме, сè повеќе Чеси се собираат на север, кон полскиот брег на Балтичкото Море.

„Климата се промени“, објаснува 50-годишната Људмила, која сега оди во Полска. „Веќе не сакам да патувам по жештините во Грција или во Хрватска. Сакам да уживам во мојот одмор без тропски температури и во мир.“

Чешките железници исто така се прилагодија на овој нов тренд. Со децении имаше директни линии до Сплит во Хрватска, но веќе ги нема. Сега Балтичкиот експрес сообраќа четири пати на ден од Прага до Гдиња, Сопот и Гдањск. Во летната сезона, овие возови се речиси секогаш полни. Стотици илјади Чеси патуваат и со автомобил до полскиот балтички брег и ја користат можноста да стигнат од Чешка до Свиноујшќе, Шчеќин или Сопот преку целосно нови и бесплатни полски автопати. И за разлика од Германците, Полјаците не ги вознемируваат Чесите со гранични контроли.

„Чешката инвазија“ внимателно ја следат и известуваат полските медиуми, новинари, па дури и полските политичари.

Статиите за одморите во Полска се меѓу најчитаните на чешките новински портали, а сите поголеми чешки весници и телевизиски компании веќе испратија специјални дописници на полскиот балтички брег. Социјалните мрежи се полни со пораки од полската ривиера, а се создаваат сè повеќе кориснички групи на оваа тема.

„Навистина може да се почувствува зголемувањето на чешките туристи на Балтичкото Море од минатата година“, известува новинарот Јакуб Медек од полското информативно радио TOK ФM за ДВ. „Имам впечаток дека ова лето Чесите се најбројни меѓу странците“. Ова е потврдено со официјални податоци. „Статистиката за ноќевањата покажува огромно зголемување на чешките туристи во Полска. Тие веќе ја претставуваат четвртата најголема група туристи – веднаш по Германците, Британците и Американците“, изјави за ДВ Павел Тројан од чешкото претставништво на Полскиот туристички одбор. „Минатата година, Полскиот завод за статистика регистрираше 410.000 ноќевања од чешки туристи“, додава Тројан, пренесува Н1 Хрватска.