Српскиот претседател Александар Вучиќ во петокот во Њујорк изјави дека не верува дека САД ќе ја променат својата одлука за воведување санкции врз Српската нафтена индустрија (НИС) на 1 октомври, најавувајќи дека ќе продолжи со разговорите и со руската и со американската страна, пишува РСЕ.

„Од утрово водиме разговори за тоа што ќе правиме по 1 октомври. Побаравме (од САД) уште едно одложување на санкциите, ќе почекаме конечна одлука, но не верувам дека ќе има некаква промена“, изјави Вучиќ за српските медиуми.

САД го одложуваа спроведувањето на санкциите шест пати од јануари, кога НИС беше ставен на листата на санкционирани компании поради нејзиното мнозинско руско сопствеништво. Последниот пат, на 26 септември, беше само за неколку дена – до 1 октомври.

Санкциите на САД имаат за цел да го спречат финансирањето на војната во Украина преку пари што доаѓаат од руски енергетски компании. Во меѓувреме, сопственичката структура на НИС се промени неколку пати, но таа сè уште е во мнозинска сопственост на руски компании.

Газпром го напушти НИС во септември, а друга компанија управувана од Газпром – Интелиџенс од Санкт Петербург – стана еден од значајните сопственици.

Акционерското друштво Интелиџенс стана сопственик на 11,3 проценти од компанијата, според податоците објавени на веб-страницата на Белградската берза на 21 септември. Најголемиот удел во НИС сè уште го држи Газпром Нефт, подружница на Газпром (44,9 проценти), а државата Србија има 29,9 проценти. Останатите акции ги поседуваат мали акционери.