Српскиот претседател Александар Вучиќ денеска изјави дека Србија ќе знае што да прави доколку Албин Курти се осмели да се обиде да ги протера Србите од Косово. и додаде дека Албин Курти денеска донел одлука да го отвори мостот кој долго време е брана за безбедноста на Србите, за да не ја преземат Албанците Северна Митровица.

„Окупацискиот лидер Албин Курти донесе одлука да го отвори мостот кој долго време беше брана за безбедноста на Србите, за да не ја заземат Митровица Албанците. Нашиот народ долги години се противеше и прашуваше зошто овој човек го прави ова. Единствено што сака е да го избрка нашиот народ и сака конфликти“, рече Вучиќ, обраќајќи им се на граѓаните во Сокобања.

Тој додаде дека Србија ќе направи се за да го зачува мирот.

„Ќе дадеме се од себе за да го зачуваме мирот, ќе се потрудиме ниту една жена да не помисли да го испрати своето дете во војна. Немојте ни да сонувате дека ќе успеете во вашите намери да ги протерате или уништите Србите, во во тој случај ќе знаеме што да правиме“, рече претседателот на Србија.

Тој додаде дека додека тој е „претседател и врховен командант, Србија нема да биде во НАТО или во кој било воен сојуз“.

„И тоа е наш избор“, посочи Вучиќ и додаде дека не може „да премине преку изборот на овој народ и да заборави што се случи со народот“.