Претседателот на Србија Александар Вучиќ вечерва во своето обраќање пред граѓаните истакна дека промената на геополитичките околности придонела за досега најостриот пристап на западните земји кон Србија и кон прашањето на Косово.

„Во договор со членовите на владата сакам повеќе да зборуваме за стратешки, а не за тактички и дневнополитички работи. Сите ја видовме првата верзија во изминатите неколку дена, која не се разликува многу од втората верзија во разни медиуми на таканаречениот француско-германски план, кој веќе не е француско-германски план, туку многу повеќе од тоа“, рече Вучиќ во Претседателството, според „Н1“.

Тој вели дека никој не сакал да зборува за контекстот и околностите и со што се соочува Србија.

„Факт е дека геополитичките околности се сменија, Европа е де факто во војна. Нема толеранција да се искочи во политичка смисла, а од друга страна тоа го сакаат во нивниот двор, а ние сме нивни и тие сакаат се да биде таму како што сакаат“, рече тој.

„Пристигна „западната петорка“ и во втората реченица што ми беше соопштена се вели – треба да го прифатите овој план (француско-германски), а ако не го прифатите, ќе се соочите со последиците. Со прекин на евроинтегративниот процес, второ, ќе се соочите со стопирање и повлекување на инвестициите, под три со сеопфатни мерки во политичка и економска смисла што ќе ѝ наштетат на Србија. Ова ми беше повторено уште трипати во текот на разговорот и секој пат жестоко реагирав“, додаде Вучиќ.

Како што наведе, целосниот европски контекст е таков што, ако се погледне внимателно, по украинско-рускиот конфликт сè стана еден од најголемите проблеми за Србија.

„Ние сме на сечиј радар затоа што не воведовме санкции, а поради постојаните инциденти кои Курти намерно ги предизвикуваше. Ова го кажав од едноставна причина, само оваа година, во времето на Курти, имавме десет инциденти. Имавме повреда на Делевиќ кој е стабилен и му посакуваме брзо закрепнување“, изјави српскиот претседател.

Вучиќ рече дека властите во Косово сакаат да предизвикаат конфликт меѓу Србија и НАТО, како и дека Белград не може да го спречи влезот на Косово во Советот на Европа и во НАТО.