Банките во Србија вршат строг надзор и граѓаните можат да бидат сигурни во банките кои работат со дозвола на Народната банка на Србија (НБС), изјави вчера претседателот на државата Александар Вучиќ по пропаѓањето на банката од Силиконската долина (СВБ). Тој додаде дека Србија ќе се погрижи да нема проблеми, објави Политика.рс.

– Очигледно е што се случи таму, Силиконската долина банка е една од клучните банки за стартапи и даваа фиксни камати на големи суми, во турбулентни времиња. Тоа е голема криза не само во САД. Гледам дека Министерството за финансии на САД работи посветено и сериозно за да нема поголеми тешкотии и последици, но има проблеми. Гледам и дека Риши Сунак, премиерот на Обединетото Кралство, се обидува да ја спаси британската филијала – рече Вучиќ. Професорот Славиша Тасиќ, кој предавал економија на универзитетите во САД и е автор на онлајн билтенот „Maркет Солушн“, за „Политика“ вели дека се чини дека оваа криза нема да се прошири низ банкарскиот систем.

– Познато е дека СВБ е концентриран на стартапи, односно на помали технолошки компании. Во неделата се чинеше дека некои стартапи кои чуваат пари во таа банка нема да ги вратат средствата, а има и поврзани со Србија. По вчерашната вест од Федералните резерви дека ќе ги покријат сите депозити на СВБ и Сигначер банка, сите се спасени – оценува Тасиќ.