Соочени сме со офанзивно делување на разузнавачките служби, рече претседателот на Србија по седницата на Советот за национална безбедност.

Седницата на Советот за национална безбдност, со која претседаваше претседателот на Србија Александар Вучиќ започна денес во 18 часот.

Лидерот на Србија ја закажа седницата поради можната разузнавачка афера, чии актери се руски разузнавач и еден претставник на српските безбедносни служби, а по завршувањето на седницата ќе бидат познати повеќе детали за овој случај чија позадина, по налог на Вучиќ, ја истражуваат безбедносните служби.

– Работат со две цели. Едно е собирање на разузнавачки податоци за да влијаат на промена на политиката на Србија, а второ е согледување на моќта и капацитетите на Србија, за да го намалат нашето делување – рече Вучиќ.

Српскиот претседател додаде дека значаен број на земји од регионот, но и големите сили, некогаш по легален, а некогаш по нелегален пат, сакаат да дојдат до сознанија за Војската на Србија, нејзината опрема, но и до други различни податоци.

– Нашите разузнавачки служби дојдоа до сознанието дека во белградската населба Земун некаде околу 18.00 часот, потполковникот на српската војска З.К. ќе се сретне со претставникот на Руската Федерација Клебан, но објавената снимка не ја направи нашата служба – посочено е на Советот.

На седницата во зградата на претседателството на Србија учествуваа и министерката за правда Нела Кубуровиќ, министерот за одбрана Александар Вулин, началникот на генералштабот, премиерката Ана Брнабиќ и многу други официјални лица.

Разузнавачката афера во јавноста е објавена откако на интернет, а потоа и во медиумите во Србија, беше објавена снимка на која може да се забележи како рускиот разузнавач Георгиј Клебан дава пари на наводен српски агент, чиј идентитет не е откриен.

Автентичноста на снимката, како и тоа дека на неа недвосмислено се гледа рускиот разузнавач Георгиј Клебан, ја потврди Безбедносно-информативната агенција (БИА) на Србија.

Рускиот амбасадор не ги коментираше содржините на закажаните разговори со претседателот на Србија кои се случија, а обидот на новинарот на Танјуг, по неговото излегување од зградата на Претседателството, да добие изјава за што разговарал со Вучиќ, беше изигнориран.

Поради можната „шпионска афера“ денес реагираше и Кремљ, во кој се уверени дека ништо не може да ги наруши односите меѓу Русија и Србија, и покрај тоа што претседателот Вучиќ отвори истрага за снимката.