Власта на српскиот претседател Александар Вучиќ со недели е во конфликт и постојани препукувања со хрватскиот дипломат и европратеник Тонино Пицула, кој е известувач во Европскиот парламент за напредокот на Србија на патот кон ЕУ. Притоа, официјален Белград внимава критиките и острите зборови за Пицула да не доаѓаат од актуелни функционери.

Денеска, ставовите на власта околу последните изјави на европратеникот ги изнесе премиерот во оставка Милош Вучевиќ, кој ги повтори обвинувањата кон известувачот за Србија дека се меша во внатрешните работи на земјата и ги нарече „скандалозни“ неговите оценки изнесени денеска – дека српските студенти, кои со месеци протестираат низ земјата, би морале политички да ги артикулираат своите барања.

„Ми се чини дека студентското и граѓанското движење во Србија бара некаква социјална еманципација, поточно, еманципација на општеството од државата, што покажува многу карактеристики на заробена држава и хибриден режим. Потребна е политичка артикулација, која сè уште не доаѓа, рече Пицула, истакнувајќи дека на протестите недостигаат знамиња на Европската унија и припишувајќи го ова на широко распространетата анти-ЕУ пропаганда што се ширела со децении во српските провладини медиуми.

Пицула во денешното интервју за „Радио Слободна Европа“ оцени и дека Србија е во „непрогласена вонредна состојба“ и дека претседателот Александар Вучиќ не нашол начин како да го компензира незадоволството на демонстрантите.

Во жестокиот одговор, Вучевиќ, кој пред десетина дена беше принуден да поднесе оставка од премиерската функција токму поради протестите и обвинувањата за корупција, го нарече Пицула „докажан србомразец“, а неговите оценки за ситуацијата во Србија ги нарече скандалозни.

„Скандалозно е неговото мешање во внатрешните работи на нашата земја, а пред сè јавниот повик до студентите дека треба да излезат со политички барања. Верувам дека нашата младина е мудра и дека ја сака својата татковина, и дека ќе ги одбие оние кои би ја газеле и растурале“, наведе Вучевиќ во соопштение до јавноста.

Тој вели дека „Србија е суверена и демократска држава“ и додава дека со неа „никогаш нема да управува еден Тонино Пицула“, порачувајќи дека „сите кои мислат добро за себе и својата татковина треба да игнорираат сè што кажува тој човек“.