По инцидентот во Врање во Србија е регистриран втор случај лице да добие вакцини против ковид од различни производители. 

Овој пат жена од Чачак поминала цела ноќ во брза помош, откако наместо „Синофарм“ со која била вакцинирана првиот пат, како втора доза добила „Фајзер“, објави Н1.

„Лута сум и огорчена, таму имаше некакво снимање и веројатно беа збунети. Кога видов на листот хартија дека не сум ја примила втората доза на кинеска вакцина, прашав што да правам“, рекла Снежана Чировиќ за српскиот портал „Нова.рс“, додавајќи дека тие одговориле дека ќе го „исправат сертификатот“.

Чировиќ раскажа и дека медицинскиот персонал скокнале врз неа и се обиделе да ја спречат кога рекла дека ќе контактира со директорот на Здравствениот дом.

„Се тресам, огорчена сум, контактирав адвокат и ќе се консултирам со него за преземање понатамошни чекори. Тие сакаа да го прикријат тоа, веројатно за да не останат без работа, но случајот мора да биде пријавен во Министерството за здравство“, рекла таа.

Немилиот настан се случил вчера, а пропустот жената го забележала на потврдата за вакцинација. Таа уште истата вечер била примена во службата за итни случаи бидејќи добила треска и мачнина која траела цела ноќ.

Медицинскиот тим за следење на епидемијата во Чачак признава дека е направен пропуст при ревакцинацијата, дека случајот е пријавен во здравствената инспекција, но дека тоа нема да се одрази врз здрвајето на жената.

Директорот на Институтот за јавно здравје, д-р Аксентије Тошиќ, истакна дека е невозможно да се дадат десетици илјади вакцини, без да се случи некој пропуст, пренесе Телеграф.рс.