Во организација на Министерството за култура и туризам, Британскиот совет и Унијата на македонските професионални асоцијации во креативните индустрии – УМПАКИ на 25 ноември, со почеток во 13 часот, во „Паблик рум (Јавна соба)“ ќе се одржи „Форум Скопје – Секторски консултации“ на кој низ јавна дискусија ќе се развијат клучните препораки за целиот креативен сектор во земјава.

На отворањето на Форумот ќе се обратат Н.Е. Метју Лосон, амбасадор на Обединетото Кралство во Северна Македонија, Зоран Љутков, министер за култура и туризам, претставник од Унијата на македонските професионални асоцијации во креативните индустрии – УМПАКИ и претставник од Британскиот совет.

За време на Форумот ќе бидат споделени увиди од експерти од Велика Британија, трендови и добри практики во однос на нивната креативна економија, на што ќе следи фокусирана дискусија за издвојување на 10 приоритети за овој сектор во Македонија.

Креативните професионалци ќе дискутираат со своите колеги на следниве теми: Градење нов идентитет преку големи културни настани; Зајакнување на комуникацијата во секторот (градење мрежа); Образование за креативни кариери; Подобрување на условите за креативна продукција.

На „Форум Скопје – Секторски консултации“ учество ќе земат еминентни дејци од оваа област во Британија, кои беа селектирани од страна на „the Beyond Conference“, водечка платформа за креативни индустрии.

Енди Брајдон e основач на меѓународната уметничка организација „Curated Place“. Тој е обучен антрополог чија специјалност е културно позиционирање на ниво на град, на регион и на хипер-локално ниво. Тој е признат и искусен културен стратег, директор на фестивали и големи настани, едукатор, како и уметнички продуцент. Има освоено престижни национални награди во Англија и Шкотска. Неговото огромно искуство придонело да ги трансформира местата преку културни настани и перформанси во соработка со тимови за развој на град, визуелни и дигитални уметници, композитори, перформери и музичари.

Покрај него во Скопје доаѓа и Сузан Финеган, комерцијален директор на секторот култура во Ливерпул, која има над 20-годишно искуство во менаџмент на настани, стратегија на дестинација и бренд активација. Таа е дел од тимот кој стои зад успехот на Ливерпул – Град на културата во 2008 година и Ливерпул – домаќин на „Евровизија“ во 2023. Нејзината работа е признаена и преку низа национални награди и признанија.

Покрај овие искусни професионалци во рамки на „Форум за креативни индустрии“ доаѓаат и Хејли Пеплер, раководител на култура, креативни индустрии и дигитална патоказна стратегија „West Midlands Combined Authority“, како и Лејла Конвеј, раководител на образование, кариера и вклучување на младите „London Legacy Development Corporation“.