Американскиот пејач Бруно Марс (39) веќе девет години одржува концерти во хотелот „Парк МГМ“ во Лас Вегас, а концертната серија ќе ја продолжи и годинава со 12 настапи на истата локација.

Според „Њуз нејшн“, делумната причина поради која Марс сè уште одржува концерти таму е бидејќи има значителен долг за коцкање во казиното во склоп на хотелот.

„Тој му должи милиони на ‘МГМ’ поради коцкање. Всушност, МГМ го поседува“, рекол неименуваниот извор.

Наводно, се работи за вртоглав долг од дури 50 милиони долари.

Да потсетиме, Марс досега зборуваше за својата склоност кон коцкањето, откривајќи дека првпат посетил казино на 19 години и дека киријата ја покривал играјќи карти.

Својот прв албум го издаде во 2010 година, а една година подоцна освои награда Греми за најдобра машка поп изведба, за песната „Just the Way You Are“.

Истата година, пејачот беше приведен во Лас Вегас, по неговиот настап во хотелот „Хард Рок“. Тогаш полицијата пронајде 2,6 грама кокаин кај него, а во моментот на апсењето и Марс бил под дејство на кокаин, што било потврдено со тест. На Марс му се закануваа четири години затвор, но судот ја прифати спогодбата, па беше осуден на 12 месеци условна затворска казна и 200 часа општокорисна работа.

Кога станува збор за приватниот живот на музичарот, тој е прилично таинствен. Марс е во врска со манекенката и актерка Џесика Кабана од 2011 година, а како што објавија американските медиуми се запознале во ресторан во Њујорк.