По една од најуспешните сезони во последните 20-тина години, Баерн Минхен се соочува со сериозни предизвици во зачувување на составот кој триумфира во Лигата на шампионите, Бундеслигата и Германскиот Куп.

Речиси сигурно е дека до крајот на преодниот рок, Баерн Минхен ќе остане без Тијаго Алкантара, а можно е да си замине и фудбалерот кој веќе 12 години е дел од првиот тим, Давид Алаба.

Австрискиот репрезентативец влегува во последната година од договорот, а Баерн веќе неколку месеци се обидува да ја продолжи соработката со Алаба, но случувањата од последните неколку дена се повеќе навестуваат дека или ова  или наредното лето ќе дојде до разделба.

Челниците на Баерн Минхен беа шокирани од агентот на фудбалерот Пини Захави и таткото на Алаба, Џорџ кои побараа австрискиот репрезентативец да стане најпплатен играч во тимот со годишна плата од 25 милиони евра.

Најплатени играчи во Баерн се Роберт Левандовски и Мануел Ноер со околу 20 милиони евра годишна плата, и поради барањето на Захави и Џорџ Алаба, челниците на баварците збеснаа бидејќи сметаат дека се уценувани.

Почесниот претседател на Баерн Минхен, Ули Хенес, јавно го обвини агентот на Алаба, Пини Захави, дека е алчна пирана и дека побарал провизија од повеќе од 10 милиони евра за продолжување на договорот, а провизија побарал и таткото на фудбалерот.

Денеска се огласи и Захави со своја страна на приказната.
– Ниту во еден момент од преговорите не зборувавме за провизијата. Единствен пат кога тоа го спомнавме беше на состанокот со Салихамиџиќ во Лисабон. Тој тогаш ме праша како мислам да го решам тоа, а јас му одговорив дека најважно е прво да се договориме за платата на играчот и дека нема да барам ништо повеќе од тоа што ми следува. Да повторам, не зборувавме за провизијата – изјави Захави.

Одговор на обвинувањата даде и таткото на фудбалерот, Џорџ.
– Го донесов Давид како дете во Баерн и за сиве овие години тој имаше многу можности да си замине од клубот. Ние бевме лојални на Баерн и тој по секоја понуда го продолжуваше договорот. Поради тоа не очекував од Баерн да шири вакви лаги во медиумите. Нивните обвинувања дека одбиваме да го продолжиме договорот поради провизиите не се вистина и сето тоа го прават за да се согласиме на нивните услови. Но, ние имаме поинакви идеи од тоа што ни е понудено – изјави Џорџ Алаба.

Давид Алаба со актуелниот договор кој му истекува 2021 година, заработува 15 милиони евра бруто годишно, а Баерн наводно му понудил послаб договор. Последната понуда на Баерн е 11 милиони евра бруто годишна плата и дополнителни шест милиони евра низ бонуси кои се лесно остварливи.