По скандалот со вработувањето на презентерката Бесмира Ејупи во Министерството за надворешни работи, за кое што министерот Бујар Османи праша: „а зошто не?“, опозициската ВМРО-ДПМНЕ излезе со нова информација, овој пат за вработувањето на Ивана Костовска, сопруга на пратеникот на СДСМ, Мартин Костовски. Таа, како што беше кажано на вчерашната прес-конференција на опозициската партија, исто како и Ејупи е вработена со преземање од друга институција.

МНР, како и во претходниот случај, и сега остана без коментар за обвинувањата за „префрлање неопходни кадри“, но и без информација од каде е преземена, а Костовска, според извори од Министерството, од пред неколку месеци е „сместена“ во одделението за соработка со НАТО.
Министерот Османи на последната прес-конференција соопшти дека во МНР се потребни уште минимум 50 нови вработувања за да се задоволат потребите. Со оглед дека само оваа година се пензионираат 18 лица, тој вели дека во МНР мора да се вработуваат нови. Веќе е во тек јавен оглас за вработување 16 државни службеници од кои четворица се началници на одделенија, а другите се соработници, самостојни и виши референти. Според огласот објавен од Агенцијата за вработување, нето-платата на овие 16 државни службеници ќе се движи од 18.582 до 30.596 денари, а за сите е неопходен безбедносен сертификат и тоа од „интерно“, преку „државна тајна“ и „доверливо“ до „строго доверливо“.

И дотука сè е вообичаено, наведени се условите што треба да ги исполнува кандидатот, општите и посебни компетенции, како и дополнителните услови. Но, на крајот стои напомена од која етничка заедница треба да е кандидатот. Па, така, од четворицата началници, тројца треба да се Македонци(ки), а еден Албанец или Албанка.

Кај соработниците е предвидено четворица да бидат од македонска, тројца од албанска и еден од турска националност. Сите референти, пак, треба да бидат Македонци.

Кога се гледаат условите што треба да ги исполнат, за кандидатите останува впечатокот дека изборот ќе биде направен „по клуч“, бидејќи во условите за местата резервирани за Албанци, на пример, никаде не се споменува албанскиот јазик како задолжителен, туку пишува само „активно да го користи македонскиот јазик“ и се бара „познавање на еден од трите најчесто користени јазици на Европската Унија (англиски, француски, германски)“. Ист е случајот и со местото предвидено за припадник на турската етничка заедница.

Инаку, според информациите од МНР, бројот на вработени таму е околу 500, вклучувајќи ги и оние што се во дипломатско-конзуларните претставништва.