Основното јавно обвинителство Скопје започна истражна постапка против пет лица, од кои еден е осомничено за кривично дело злоупотреба на службената положба и овластување, додека останатите четири лица се осомничени за помагање, извести ОЈО.

Станува збор за поранешниот директор на Централниот регистер Андреа Поповски и чертворица негови поранешни соработници, кои вчера беа уапсени по налог на Финансовата полиција.

„Од 16 декември 2014 година до 29 мај 2017 година, првоосомничениот како директор на Централниот регистар, со пречекорување на границите на своето службено овластување, усно наредил една вработена да биде евидентирана како редовно присутна на работа во месечните листи кои ги изготвувало Одделението за човечки ресурси, иако бил свесен дека цело време вработената воопшто нема да доаѓа на работа, туку ќе биде ангажирана за партиски активности на една политичка партија.

Спротивно на законските акти и правилниците на Централниот регистар, таквата листа била доставувана до Одделението за финансиско-сметководствени работи и врз основа на тоа на вработената неосновано и била исплаќана плата и придонеси на плата, со што била нанесена значителна штета на буџетот на институцијата.

Останатите четворица вработени, од кои тројца од Одделението за човечки ресурси на Централниот регистар и едно одговорно лице за работењето на Регионалната регистрациона канцеларија – Скопје, се осомничени дека со умисла му помогнале на в.д. директорот во извршувањето на кривичното дело.

Ценејќи дека се исполнети законските основи, надлежниот јавен обвинител до Основниот кривичен суд Скопје бара притвор за поранешниот директор, додека за тројца од осомничени ќе биде побарано определување мерки на претпазливост“, се вели во известување на Обвинителството.