Косовската јавност е згрозена откако на социјалните мрежи беше објавена вознемирувачка снимка од дом за стари лица во Пеќ, на која се гледа како млада работничка, негувателка или медицинска сестра, малтретира и тепа стара жена, жителка на домот.

Инцидентот се случил пред неколку дена во приватниот старски дом во Пеќ. На видеото се гледа како вработената ја удира по главата повозрасната жена.

Нејзината колешка во првите моменти од насилството сака да ја отргне од намерата, но таа продолжува да ѝ удира шамари на жената.

Веста ја потврди и портпаролот на полицијата на Пеќ, Фадиљ Гаши, кој информира дека медицинските сестри се уапсени на работното место, денеска околу 14 часот.

Според соопштението на Основното обвинителство Пеќ, тие се осомничени дека сториле кривично дело „насилство“ и кривично дело „помагање во извршување на кривичното дело насилство“.

Снимката прва ја објави актерката Каљтрина Зенели.