Стотици километри разрушени подрачја, без струја, ожалостени семејства, морбидни слики, но и народ кој и покрај големата трагедија која ги снајде, знае да се носи со предизвиците.

Ова се впечатоци на тетовецот Александар Стојановски од Тетово, волонтер во тимот за спасување при Дирекцијата за заштита и спасување кој во турскиот град Адијаман беше дел од македонскиот тим кој помагаше во разрушените подрачја.

Спасувањето вели Стојановски е голема и сложена работа. Ние го направивме тоа што можевме да го направиме, но сите придонесоа на некој начин во спасувачкиот процес, кој би бил залуден без тимска работа, но и помош од локалните заедници и тимови.

„Бевме во градот Адијаман, работевме на неколку локации. Со самото пристигнување во Турција можам да кажам дека е огромно разрушувањето, огромни територии кои се зафатени од земјотресот. Со самото тоа што стигнавме навечер немаше струја и сето тоа изгледа многу морничаво и страшно. Возевме околу 200 километри низ разрушеното подрачје додека стигнавме до градот, така да се работи за голема територија која е зафатена од земјотресот“, раскажува Стојановски.

Македонскиот спасувачки тим од Дирекцијата за заштита и спасување и пожарникарите од неколку единици од Македонија по пристигнувањето во градот Адијаман, поставиле шатори. Биле ангажирани во неколку акции, од кои во една спасија и човечки живот.

Изненадени се од големата солидарност на населението во тие кобни моменти за нив. Се помагаа максимално меѓу себе, но и нас многу добро не прифатија, додава Стојановски

„Со нашето присуство тие увидоа дена не се сами и имаат поддршка. Имаа голема почит кон нас и позитивно сум изненаден како е тоа еден сталожен и стабилен менаталитет и покрај оваа несреќа, тие можат да се носат со секојдневните предизвици. Така да ние кога работевме на локацијата постојано ни нудеа вода, чај, јадење, не само нас туку и самите меѓу себе се помагаа и убаво е така да се види дека човечкиот род е солидарен. Поминуваа луѓе, не прашуваа што ни треба, се понудија да ни го платат горивото, ние им помагавме нив, но и тие ни помагаа нас“, вели Стојановски.

Треба да помине долго време додека се врати животот во нормала во погодените подрачја во Турција, додава Стојановски, но хуманоста и солидарноста која ја видел таму вели ќе ја победи катастрофата, во која илјадници животи беа загубени под урнатините.