Војската на Мјанмар синоќа пукала врз конвој кој носел помош во областите погодени од земјотресот, јавува Би-Би-Си.

Националната ослободителна армија Таанг (TNLA), вооружена бунтовничка група, соопшти дека војниците пукале врз конвојот со девет возила користејќи тешки митралези додека минувал низ населеното место Наунг Чо во северната провинција Шан на пат кон Мандалај.

Според информациите, конвојот ја информирал хунтата за својата рута и за плановите за испорака на помош. Армијата пак тврди дека не била информирана дека конвојот ќе помине и дека отворила оган бидејќи конвојот не застанал. Во нападот, како што соопшти Хунтата, нема повредени, а инцидентот се истражува.

Зградите во Мјанмар се уште се уриваат пет дена по силниот земјотрес што ја погоди земјата, создавајќи опасни услови за спасувачите додека се обидуваат да извлечат преживеани од урнатините.

Повеќе од 2.900 луѓе ги загубија животите во земјотресот со јачина од 7,7 степени, додека илјадници се повредени. Стотици луѓе се уште се водат како исчезнати, што значи дека бројот на загинати речиси сигурно ќе се зголеми.