Политички и економски санкции, ембарго на меѓународни блокови кон одредени држави, заплена на личен имот, но и забрани за патувања, се актуелниот тренд на политики што се практикуваат во светската политика во моменти кога најголем глобален предизвик е војната во Украина.

Откако САД неодамна забранија увоз на руска нафта, јаглен и гас поради Украина, Британија најави дека ќе ги поддржи но постепено а Европските земји протераа стотина руски дипломати, Русија деновиве возвраќа со контра мерка.

Имено, официјална Москва денеска најави дека воведува низа санкции против 398 членови на американскиот Конгрес и 87 канадски сенатори.

Според Интерфакс, руското Министерство за надворешни работи соопштило дека воведувањето санкции е одговор на американските санкции воведени минатиот месец против 328 пратеници во руската Дума.

Официјална Москва соопшти дека наскоро планира да воведе дополнителни блокади кон САД при тоа не прецизирајќи за што станува збор.

Во светлост на случувањата неодамна германскиот експерт Томас Штраубхар посочи дека трговскиот судир што во моментов се води меѓу Вашингтон и ЕУ, од една страна, против  Москва но и Пекинг, од друга страна, не е само за војна во трговијата или санкции, туку за нешто многу пофундаментално.

– Актуелниот трговски но и политички конфликт преку санкциите е само најистакнуваниот знак од многу поголемата битка во епохалната трка за моќ, доминација и превласт во 21 век. Сведоци сме на судир на два геополитички гиганти, судир меѓу „Америка на прво место“ и „Мејд ин Чајна и Русија“ – оценува германскиот експерт Штраубхар.

Предходно рускиот претседател Владимир Путин учествувајќи на виртуелен состанок за економски и развојни прашања на арктичките територии на Русија и рутата на Северното Море истакна дека санкциите подеднакво им штетат и на Русија но и на европските земји и на САД.

– Сега, земајќи ги предвид различните надворешни ограничувања и притисоци од санкции, мора да посветиме посебно внимание на сите проекти и планови поврзани со Арктикот. Одбивањето на нормална соработка на западните земји со Русија подеднакво им штети на европските земји и на САД – рече Путин.

Рускиот претседател посвети посебно внимание на западните санкции и последиците од нив иако директно не се осврна на ситуацијата во Украина.