Моторните пловни објекти што масовно се користат во текот на летната туристичка сезона нанесуваат големи штети на животната средина. Според експертите од Хидробиолошкиот завод од Охрид нивната употреба предизвикува не само физички, туку хемиски и биолошки промени што негативно влијаат врз живиот свет во Охридското Езеро. Поради тоа експертите бараат во иднина да се користат чамци кои ќе користат еколошка енергија за нивно придвижување, информира МРТ.

– Хемиските промени доаѓаат поради тоа што се користат тип горива што предизвикуваат нарушувања, меѓутоа исто така со средствата за чистење, средствата за одржување на пловните објекти, испуштање масла во водната средина, сето тоа предизвикува нарушување и секако оние на крај последици што се биолошки, односно промени во начинот на однесување на живите организми“, Орхидеја Тасевска, директорка на Хидробиолошки завод Охрид.

Загадувањето од моторните чамци е само дел од проблемите, бидејќи со децении наназад реките што се влеваат во езерото со себе носат големи количини отпадни води.
– Реките Коселска, Велгошка оставаат последици врз животната средина затоа што дел од нив поминуваат низ аграрни површини, а поминуваат низ населени места каде што не е решен проблемот со отпадните води и за жал дел од тие отпадни води се влеваат директно во речните корита, а понатака завршуваат во Охридското Езеро – додава Тасевска.
Среќна околност е тоа што езерото се самопрочистува, за што потврда се јулските резултати од анализите на охридскиот Центар за јавно здравје, кои покажуваат дека езерската вода на дел од крајбрежјето е од прва и втора категорија, што значи дека е безбедна за капење, рекреација и спорт.