Водачот на групата „Беланоца“, Фатљум Ајети – Тоте, чии соработници беа цел на полициската акција што се спроведуваше ноќеска, издржува казна затвор за трговија со дрога и оружје и е син на претходниот водач на оваа група, Џељал Ајети – Џељо, кој беше ликвидиран во 2013 година.

Поголемиот дел од затворската казна, тој ја издржуваше во затворот „Идризово“ од каде често беше активен на социјалните мрежи, кратко беше во затворот во Штип, од каде по затворскиот бунт повторно беше вратен во „Идризово“.

Во меѓувреме откако петмина затвореници, меѓу кои и Тоте од затворот „Идризово“ беа преместени во затвори во Штип и Прилеп беше запален службениот автомобил на директорот на затворот „Идризово“, Зоран Јовановски кој тогаш изјави дека криминалци му праќаат порака.

Иако Тоте беше вратен во најголемиот затвор, сепак не издржа долго таму и беше преместен во затворот во Куманово.

Акцијата на Министерството за внатрешни работи и Обвинителството за гонење на организиран криминал и корупција откри дека всушност Тоте командувал од затвор и дека создал група вмешана во убиства, изнуди, но и палење на локали и автомобили на затворски чувари.

Истрагата е против 18 лица, но четворица се нови уапсени, а од Министерството за внатрешни работи нема официјално соопштение колку се точно во затвор од групата, колку се во притвор, колку се ново уапсени и колку се избегани.

Меѓу водачите на групата е Гани Туша, кој првично беше осомничен за вмешаност во двојното убиство во „Шиша бар“, кога беа убиени двајца водачи на групата „Дуќанџик“, а сега е во притвор за убиството на Орхан Бајрами – Оки исто така еден од поглавните луѓе на ривалската група и Зулќуфли Нуредини – Мали Репки кој е познат бегалец од затвор.

Групата била формирана во 2021 година кога Тоте е осомничен во полициска акција за сузбивање на криминална група која се занимавала со трговија со оружје, но не завршил веднаш во притвор.

Организаторите, според Обвинителството, подготвувале планови и носеле одлуки кој, каде, кога и на каков начин ќе биде ликвидиран.

-Притоа, одлуките ги спроведувале лично или преку други припадници на групата плаќајќи од 10.000 до 250.000 евра за убиство. Па така, во име на поддршка на радикалното движење во РСМ или заради безобзирна одмазда кон лица од спротивставена криминална група во периодот од 2020 до 2024 година во шест кривично правни настани лишиле од живот осум лица, три лица биле тешко повредени, а на три лица животот им бил во опасност, соопшти Обвинителството.

Освен убиства тие изнудувале и пари на месечно ниво, но им се плаќале поголеми износи и еднократно. Парите ги изнудувале насилно, со закани, но и со палење на угостителски објекти.

– Секој од нив имал задачи во делот на планирање, упатување на закани, како и на земање на пари, за наводно обезбедување на објекти, меѓу кои и на спортски обложувалници. Оваа криминална група опожарила пет спортски обложувалници и една сендвичара. Групата се поврзува и со опожарување на возилата на вработени на затворската полиција – рече министерот.

Групата „Беланоца“ и групата „Барон“ станаа актуелни по двојното убиство што се случи во март 2023 година кога беа убиени Јетон Кривањева – Жила и Енес Исеинов-Љаци од „Дуќанџик“.

Кланот „Дуќанџик“ во деведесеттите бил единствен клан којшто постоел, а на чие чело биле Џељал Ајети Џељо и Агим Шерифи, вујкото на Орхан Бајрами – Оки.

Од овој клан се создала всушност групата „Беланоца“, по убиството на Шерифи. Групата „Дуќанџик“, потоа предводена од Бајрами – Оки, внук од сестра на убиениот Шерифи, долг период се сомневаше дека позади ликвидацијата стои Аети поради несогласувања при давање лихва во казината во Скопје.

Тогаш се диференцира и издигнува „Дуќанџиќ“, која почнува да склопува сојузи со групи од други делови на Скопје, додека таборот на браќата Ајети продолжуваат да дејствуваат како клан „Беланоца“, со база во Сингелиќ и Арачиново. Но, во ноември 2013 година, ликвидиран е Џељо.

Маскирано лице влезе во неговата чајџилница „Кај Џељо“ во Ченто и со калашников испука 30 куршуми во него, додека Ајети седел на маса со уште три лица.

Пет години по убиството на Џелал Ајети, ликвидиран беше и неговиот брат, кој го наследи на чело на групата – Наим Ајети. Тој беше изрешетан со калашников во центарот на Скопје, на улицата Рузвелтова по филмска бркотница со возила.

Тоте останува како водач на „Беланоца“, но негова ривалска група останува и „Дуќанџик“ која е во пакт со групата „Грчец“ предводена од Шеваљ Муареми, кој сега е во бегство во Дубаи.