Америка и најмалку девет сојузници на НАТО се согласија да испратат „десетици“ системи за противвоздушна одбрана во Украина во наредните месеци, вклучително и најмалку четири батерии за системот „Патриот“.

Киев Индипендент пишува дека ова е објавено во заедничко соопштение во пресрет на вчерашниот почеток на тридневниот Самит на Алијансата во Вашингтон. Соопштението го објави Белата куќа, во кое се наведува дека САД, Германија и Романија „брзо“ ќе ѝ обезбедат на Украина дополнителни батерии „Патриот“, додека Холандија ќе ги обезбеди компонентите неопходни за функционирање на една батерија од овој систем за противвоздушна одбрана.

– Овие пет стратешки системи за противвоздушна одбрана ќе помогнат во заштитата на украинските градови, цивилите и војниците, а ние сме во тесна координација со украинската Влада за да можат овие системи наскоро да се користат – се вели во соопштението.