Турскиот министер за внатрешни работи Сулејман Сојлу соопшти дека во акцијата „Гази Тургут Аслан“, насочена против финансиските структури на организацијата ФЕТО, за која турските власти велат дека е терористичка, се приведени 543 осомничени, јавува Агенција Анадолија (АА).

Сојлу зборуваше за операцијата во Координативниот центар за безбедност и вонредни состојби на Министерството (ГАМЕР).

Тој рече дека операцијата е започната како резултат на осуммесечна детална работа и дека е насочена кон сегашните структури на ФЕТО, регрутирање нови членови и откривање извори на финансирање.

Сојлу додаде дека станува збор за операција организирана откако дознале дека постојат структури, вклучително и членови на ФЕТО кои избегале во странство, кои продолжуваат со своите активности во земјата и во странство и се занимаваат со одржување на постоењето на терористичката организација и нејзиното финансирање.

По неуспешниот обид за државен удар против власта на Реџеп Таип Ердоган во 2016 година, во Турција се уапсени и осудени на затворски казни над 90.000 луѓе кои се обвинети за поврзаност со ФЕТО, чијшто водач Фетула Ѓулен од 1999 година е во егзил во САД. Затворени се повеќе од 1.500 организации обвинети за поврзаност со ФЕТО, а турската влада постојано врши притисок и врз други земји да ги затворат активностите на таквите организации.