Денес во кругот на Клиничката болница во Тетово беше претставен планот за изградба на меморијален парк за жртвите од пожарот во Модуларната болница. Тоа беше најавено од министрите Азир Алиу и Арбен Фетаи, кои заедно со повеќе пратеници и претставниции на семејствата на настраданите во пожарот во модуларната болница, при тоа положија и цвеќе на местото предвидено за уредување на парковска површина.

„Денес не започнуваме само со изградба на парк. Започнуваме изградба на колективна меморија. Задоцнета, но неопходна. Пред 4 години на ова место се случи трагедија која не смее да се заборави, но институциите 4 години молчеа. Не презедоа ништо, избраа да не гледаат, а тоа молчење беше неправда за оние што ги изгубија животите и за сите тие што секојдневно ја бараат правдата. Овој проект не е за сликање. Овој парк не е украс. Тој доцнежниот одговор што системот требаше да го даде одамна, но денес конечно започнуваме и тоа започнуваме поинаку“, истакна министерот за здравство Азир Алиу.

Според министерот проектот е почнат само неколку недели по неговото преземање на функцијата министер за здравство. Тој рече дека Меморијалниот парк нема да има прави патеки, бидејќи ни животот не бил правичен за овие луѓе.

„Архитектурата ја следи филозофијата на прекината рамка, свиени патеки,дрвја што создава сенка за размислување и рефлексија, симболичен центар за да се памети и да се и вети дека ова нема да се повтори повеќе. Немаме луксуз да заборавиме и немаме веќе право да доцниме. Овој парк е повеќе од простор. Тој е културен пресврт, јасна одлука против молчењето покана за размислување и ветување дека институциите мора да бидат блиску до граѓаните. Не само по трагедиите, туку и пред нив. Ние се сеќаваме дејствуваме и градини систем што не заборава“, истакна Алиу.

Oд Иницијативата „Нула“ ја поздравуваат одлуката на Општина Тетово и Министерството за здравство за изградба на јавен спомен-парк на просторот каде што се случи трагедијата во модуларната болница во Тетово.

Оттаму велат дека овој парк треба да претставува простор на сеќавање во чест на 14-те жртви, во знак за поддршка на нивните семејства што се уште бараат правда, но и како потсетник за едно општество што одбива да заборави.

Сепак, од оваа Иницијатива предупредуваат политичарите да не го користат настанот за означување на почетокот на изградбата на меморијалниот парк за прибирање политички поени, токму пред локалните избори.

На 8 септември 2021 година во пожарот во модуларна болница животите ги загубија 14 луѓе, пред се пациенти болни од Ковид-19.