Салван Момика, ирачкиот активист и дисидент кој го запали и сквернавеше Куранот и предизвика бес низ муслиманскиот свет во 2023 година, е застрелан во предградие на Стокхолм, објавија шведските медиуми.

Шведската полиција потврди дека едно лице е застрелано синоќа.

Судот во Стокхолм денеска требаше да ја објави пресудата за Салван Момика, кому му се судеше под обвинение за поттикнување омраза.

Денеска судот најави дека ќе го одложи издавањето на пресудата „бидејќи еден од обвинетите починал“.

Пријателот на Момика, Салван Наџем, кој исто така требаше да се појави на суд поради палењето на Куранот, утринава твитна: „Јас сум следниот“.

Според Дејли мејл, Момика бил убиен додека одел во живо на Тикток.

Пет лица се уапсени во врска со смртта на Момика, изјави обвинителот Расмус Оман, кој ја води истрагата.

Кој е Салван Момика?

На големиот муслимански празник Бајрам во јуни 2023 година, Салван Момика стапна на копија од Куранот и ја запали пред најголемата џамија во Стокхолм. Инцидентот е снимен со камера.

Малку се знае за раниот живот на Момика, но сликите и видеата го покажуваат како водач на милицијата во Ирак.

Во едно претходно видео, тој се опиша себеси како шеф на христијанска милиција. Неговата група беше дел од бригадите на Имам Али, организација формирана во 2014 година и обвинета за воени злосторства, според France24.

Бригадите на Имам Али дејствуваат под силите на Народната мобилизација, мрежа на групи, од кои некои се интегрирани во ирачката армија за да се борат против Исламската држава.

Момика ја предводеше својата вооружена група во предградието на Мосул во 2017 година.

Во 2018 година, тој избега од Ирак по борбата за власт со Рајан ал-Калдани, водач на друга христијанска милиција.