Почна лидерскиот самит на Европската Унија и Западен Балкан во Скопје, кој е посветен на Планот за раст и кој ќе биде можност за евалуација на постигнатиот напредок и дефинирање на следните чекори за зајакнување на европската интеграција на регионот.

На самитот, кој се одржува во хотел Хилтон во Скопје, домаќин е премиерот Христијан Мицкоски, кој ги пречека еврокомесарката за проширување, Марта Кос, како и лидерите од земјите од Западен Балкан, меѓу кои се премиерот на Косово Албин Курти, премиерот на Црна Гора, Милојко Спајиќ, албанскиот премиер Еди Рама, претседавачката со Советот на министри на Босна и Херцеговина Борјана Кришто.

Во рамки на лидерската средба ќе се одржат два панела од кои првиот ќе биде посветен на Планот за раст на Западен Балкан и на него ќе се обратат премиерот Мицкоски и еврокомесарката за проширување, по што ќе следи заедничка прес-конференција.

Вториот панел ќе биде посветен на конкретните механизми и поддршка за спроведување на Планот за раст.

Премиерот Мицкоски вчера во Владата одржа средба со еврокомесарката Кос, на која ѝ ја истакнал определбата на Владата за интеграција во ЕУ, достоинствено и преку спроведување на суштински реформи во клучните области.

Еврокомесарката Кос, посочува тој во објавата, ја поздравила реформската агенда на Владата и ја потврдила поддршката на Европската комисија за напредокот на регионот на европскиот пат.

Мицкоски синоќа во Скопје ги пречека и лидерите од регионот кои ќе учествуваат на самитот.