Хуманитарен пункт каде што ќе се собираат материјални добра за граѓаните кои настрадаа од пожарите во Источна Македонија во државата ќе биде отворен денеска во Скопје.

Граѓаните ќе можат да донесат конзервирана храна, облека, патики, мебел, душеци и разни други материјални добра, кои потоа ќе бидат однесени во 30-тина села на околу 400 домаќинства. Пунктот ќе биде до „Ист гејт мол“, во близина на комуналното претпријатие.

Акцијата е во координација на Коалицијата предводена од „Хуманитарни акции.мк“, Конфедерација на синдикалните организации на Македонија КСОМ и ИПО Интернационална полициска организација.

Хуманитарната акција ќе трае неколку дена со цел подобрување на животот на граѓаните чии домови се опожарени во Источна Македонија. Граѓаните ќе можат да донираат и врати и прозорци, што е планирано за втората фаза од акцијата.

Организаторите ги повикуваат сите граѓани да дојдат со своите донации, кои потоа ќе бидат однесени до семејствата кои се загрозени од пожарите.