Рускиот министер за надворешни работи, Сергеј Лавров, објави дека пејачи од 23 земји ќе учествуваат на претстојниот натпревар за песна Интервизија, руската верзија на Евровизија, откако на Русија ѝ беше забрането учество на Евровизија по инвазијата на Украина, пишува „Африка њуз“.

„Ќе има учесник од САД. Владата, администрацијата на САД, не се спротивстави, но рече дека тоа треба да биде приватна работа на изведувачот“, рече Сергеј Лавров на прес-конференција во вторникот во Москва.

„Администрацијата на САД нема да биде претставена во жирито и нема да испрати официјална делегација, но изведувачот ќе биде таму“.

Натпреварот се смета за обид да се воскресне можност за меѓународен настап за руските пејачи, по нивната забрана за учество на Евровизија како одговор на руската инвазија на Украина во 2022 година.

Сергеј Кириенко, прв заменик-шеф на руската претседателска администрација, истакна дека секој што сакал да учествува на натпреварот добил можност. Сепак, на некои потенцијални учесници им било оневозможено да го сторат тоа поради политичките ограничувања наметнати од нивните влади.

„Да бидам искрен, знаеме дека имаше неколку изведувачи кои навистина сакаа да дојдат, но нивната желба не се совпадна со мислењето на раководството на соодветните земји“, рече Кириенко.

„Нема дискриминација на местата поврзани со иницијативите на Русија. Сакаме Русија и рускиот народ да бидат познати. Ги сметаме бариерите што ги подигна колективниот Запад за штетни“, нагласи Лавров.

На прашањето дали натпреварот е алатка за зајакнување на руската „мека моќ“, Лавров одговори: „Ако под мека моќ подразбирате можност да им дадете до знаење на другите за себе, тогаш, се разбира, ние сме заинтересирани за тоа“.

Меѓународниот музички натпревар Интервизија ќе се одржи на 20 септември, во Москва. Ќе учествуваат изведувачи од над 20 земји, вклучувајќи ги сите земји-членки на БРИКС, ЗНД, како и нации од Азија, Африка и Латинска Америка.