Најмалку седуммина загинаа и 136 лица се ранети во жестокиот руски ракетен напад во центарот на украинскиот град Чернихив. Меѓу убиените е и шестгодишно девојче,  а украинските медиуми јавуваат дека девојче на 12-годишна возраст е во тешка состојба. Меѓу ранетите има 15 деца. Во болница се 25 ранети лица.

– Повеќето од жртвите на денешниот руски напад врз Чернихив биле во возила или преминувале по улицата кога бил извршен нападот. Многу луѓе се враќале од црква, а мајките шетале со своите деца во блискиот парк – изјави министерот за внатрешни работи Ихор Клименко.

Тој додаде дека централниот плоштад во Чернихив бил заглавен со сообраќај во моментот на нападот.

Советникот на министерот за внатрешни работи Антон Герашченко објави видео на кое се гледа моментот на ракетниот напад со врз објект во центарот на Чернигов. Герашченко објави и вознемирувачко видео снимено неколку моменти по нападот, на кое се гледаат граѓани како се обидуваат да им помогнат на жртвите кои лежат во локви крв.

– Русија е терористичка држава – напиша тој.

ОН го осудија нападот во центарот на Чернихив.

– Крајно сум вознемирена од веста за уште еден руски напад што неодамна го погоди срцето на Чернихив, во северна Украина, убивајќи и ранувајќи десетици цивили, вклучително и деца –  изјави Дениз Браун, шефица на ОН во Украина.

Криминално е, додаде таа, да се напаѓа главниот плоштад на голем град наутро, додека луѓето шетаат, а некои одат во црква за да одбележат верски ден за многу Украинци. Браун го осуди „образецот на руското бомбардирање на населени области во Украина, што предизвикува смрт и масовно уништување“.

– Нападите насочени против цивили или цивилни објекти се строго забранети со меѓународното хуманитарно право. Тоа мора да престане – рече таа.

Медиумите од Русија наведуваат дека цел на нападот било собиралиште на специјалци за борбени дронови на Вооружените сили на Украина, кои наводно се сретнале под маската на фестивал.

– Удрено е собирното место на командниот штаб на вооружените сили на Украина. Тој настан е извршен под мерки на тајност. Ракетата го погодила објектот што го користел украинскиот воен персонал – рекол извор на РИА Новости.

Руската новинска агенција објави и скриншот од пресретнати пораки кои наводно содржат упатства за пристигнување на фестивалот.

„Ве повикуваме да дојдете на настанот во цивилна облека за да избегнете идентификување  како поврзан со воената сфера“, се вели меѓу другото во пораката.

И украинските медиуми јавуваат дека во театарот во моментот на нападот се одржувал состанок на воени експерти.

Марија Берлинска, специјалист за набавка на беспилотни летала за вооружените сили на Украина, изјавила дека во театарот се одржал состанок на тема „воени технологии за фронтот“ и дека насобраните отишле во засолништето веднаш штом се огласи сигналот за опасност од воздух.

Командантот на специјалната дивизија на нападни беспилотни летала им раскажал на медиумите што се случило неколку минути пред ракетниот напад.

– Домаќинот го претстави настанот, ја пеевме националната химна и само што завршувавме со  минутата молчење го слушнавме сигналот за воздушен напад. Организаторите ги замолија сите да се симнат во прифатилиштето под театарот. Отидов на вториот кат да најдам пријател и додека се спуштав долу имаше удар – изјавил  украинскиот командант, според кој на состанокот имало повеќе од 200 луѓе.