Најголемата пловечка населба во Европа наскоро би можела да никне во срцето на Ротердам, на местото на поранешното пристаниште Спервегавен, кое датира од крајот на 19 век. Во време кога европските градови бараат решенија за недостатокот на простор за домување, овој амбициозен проект претставува иновативен пристап кон користењето на урбаните ресурси. Зад концептуалното решение стои данското архитектонско студио MAСТ во соработка со изведувачот БИК боув.

Доколку сè оди според планот, населбата ќе биде сместена веднаш на вода, во рамките на поранешната индустриска зона на Ротердам, што ќе трансформира запуштена област во жива, одржлива заедница. Проектот предвидува изградба на 100 прифатливи станови, со дополнителни комерцијални објекти и рекреативно пристаниште. Посебен фокус е ставен на заедничките простории, кровните тераси, пловечките патеки и богатата вегетација што ќе се протега низ целата населба.

Зградите ќе бидат изградени надвор од локацијата, со употреба на вкрстено ламинирана дрвена граѓа, по што ќе бидат поставени на пловечки темели. Еден од клучните аспекти на проектот е нивната мобилност – објектите можат да се преместуваат по потреба, на пример по истекот на договорот за закуп, објави Каматица. Планирана е и целосна интеграција со урбаната инфраструктура. MAСТ објави дека населбата ќе биде погодна за велосипеди и чамци и поврзана со постојната велосипедска мрежа на Ротердам. Мостовите на двата краја од пристаништето ќе овозможат пристап до паркинг за велосипеди, пловечки патеки и зелени површини.