Културно-социјалниот простор „Центар-Јадро“ направи резиме на своите програмски активности во текот на 2022 година, во која беа реализирани бројни настани, изложби, претстави, работилници, дебати, промоции, а преку отворениот календар многубројни организации, колективи, иницијативи и поединци беплатно ја реализираа својата програма во просторот на центарот.

– Во текот на 2022 година просторот на КСП „Центар-Јадро“ беше искористен за реализација на вкупно 96 различни програми кои беа одржани во вкупно 405 термини, од кои: 56 јавни програми, во 190 термини, и 40 работно-продукциски програми, во 215 термини. Од програмите најзастапени беа изложбите, работилниците, театарските и танцовите проби и перформанси, музички настани, разговори со уметници, промоции на книги, конференции и работни состаноци – посочија од КСП „Центар-Јадро“.

Во 2022 година просторот го користеле 80 организации или поединци, а во подготовката, реализацијата и изведбата на програмите учествувале над 800 луѓе.

Во мај 2022, во рамки на проектот „REGLab“ и неговиот работен пакет наменет за програмска размена и соработка помеѓу сродни центри од регионот, „Центар-Јадро“ беше гостин во „Погон“ – Центар за независна култура и млади, Загреб.

Во рамки на програмската размена „Центар-Јадро“ претстави програми на дел од македонската независна културна сцена, меѓу кои беше една од сопствените програми на КСП „Центар-Јадро“, групна изложба на современи македонски уметници „Уште еднаш ќе биде премногу: Посредување на невозможноста“, проследена со промоција на книгата „Во дијалог“, како и перформансите на домашните изведувачки уметници и авторки Ивана Коцевска (со компилацијата на нејзините два танцови перформанса „Where’s Your Gravity“ и „Chance-Dance“) и Ивана Балабанова (со нејзините перформанси „Сирово“ и „Code 9“).

„Места на дарежливост – трансформативни станици“ е проект кој беше реализиран во две фази во текот на целата година и во чии рамки се реализираа серија работилници со домашни и странски автори, како и реализација на пет партиципативни проекти на домашни автори.

Оваа година за првпат беше организиран и „Маалски фестивал“, кој доби одлични реакции и критики од стручната и пошироката јавност.

– Се надеваме дека „Маалски фестивал“ во иднина ќе продолжи да расте и дека ќе продолжи да ја обединува работата на уметничката сцена во соработка со локалната заедница – истакнуваат од КСП „Центар-Јадро“.

Како и во претходните две години, Центарот го продолжи отворениот конкурс за реализација на мурал на фасадата на објектот на „Центар-Јадро“. Новиот мурал е реализиран од младата и талентирана илустраторка Андреја Бојковска.

Во издавачката дејност од печат излегоа „Во дијалог: Визуелна и применета ликовна програма на КСП ’Центар-Јадро‘“, кој вклучува разговори и интервјуа со визуелни уметници и дизајнери од локалната сцена и „Места на дарежливост – трансформативни станици 2“, во чиј фокус беа резултатите од серијата работилници кои беа реализирани преку овој проект.

Од печат излезе и ЦД со албумот „Sound Reanimation“, кој e компилација на песни од учесниците на курсот по аудиопродукција, кој траеше осум месеци во периодот од јуни 2020 до мај 2021 година.

Асоцијацијата „Јадро“ и КСП „Центар-Јадро“ изразуваат огромна благодарност за безрезервната поддршка на Општина Центар – Скопје, партнер во оваa заедничка приказна. Програмските активности се реализираа со финансиска поддршка од Министерството за култура, Фондација Отворено општество – Македонија и Град Скопје.