Обединетите Арапски Емирати се соочуваат со нагло зголемување на температурите ова лето, по најжешката пролет досега, при што температурите достигнаа речиси рекордни максимуми на почетокот на август, според податоците од Националниот метеоролошки центар (NCM).

Температурата во пустинскиот град Свејхан достигна 51,8 степени на 1 август, што е само малку пониско од највисоката температура на сите времиња во ОАЕ од 52,1 степени , која беше измерена во јули 2002 година, исто така во Свејхан, пренесува Ројтерс.

Иако NCM ги предупреди жителите да го ограничат изложувањето на сонце и да избегнуваат престој на отворено во најжешкиот дел од денот, ваквите мерки на претпазливост не се секогаш изводливи за оние кои работат на отворено, како што се градежните работници и земјоделците.