Центарот за управување со кризи соопшти дека до 13 часот регистрирани се 13 пожари на отворено од кои четири се активни пожари. Најкритично е во Прилеп, Крушево и во Малешевијата каде од денеска на македонските пожарникари им се приклучија и тимови од Чешка и Словенија.

Директорот на Диркецијата за заштита и спасување, Стојанче Ангелов изјави дека едниот крак на пожарот кај планината Готен го гасат локалните пожарникари со поддршка од тимови на ЈП Национални шуми, Дирекцијата за заштита и спасување (ДЗС) како и локалното население.

Најкритично е кај селото Нивичино, кое се протега низ општините Василево, Радовиш и Берово. Пожарот таму зафатил делови од планините Голем Готен и Малешевските планини, каде гори нискостеблеста шума, смрека, грмушки и сува вегетација.