Во јуни минатата година, во експлозијата на приватната подморница Титан, која се спушташе кон потонатиот брод Титаник, загинаа сите пет патници, кои, според извештаите, загинале во дел од секундата.

Наводен транскрипт од комуникацијата меѓу подморницата и матичниот брод кружеше на социјалните мрежи. Транскриптот сугерираше дека патниците биле свесни за претстојната експлозија. Но, шефот на тимот на американската сојузна влада што ја истражува катастрофата рече дека целиот транскрипт е фикција, пишува Њујорк Тајмс.

„Убеден сум дека се работи за лажен транскрипт. Сето тоа е измислено. Некој го направи тоа доволно убедливо“, изјави капетанот Џејсон Д. Нојбаер, пензиониран член на американската крајбрежна стража, која започна истрага за експлозијата во јуни минатата година, и претседател на Одборот за истражување на Маринскиот корпус.

Транскриптот кој кружи на социјалните мрежи сугерираше дека патниците на подморницата биле свесни за бројните аларми што биле активирани во подморницата и дека навремено го информирале бродот од кој се спуштиле. Во меѓувреме, како што се дознава, американските инспектори дошле и до записи за реалните комуникации меѓу подморницата и матичниот брод Полар Принс. Сепак, таа информација остана необјавен дел од истрагата.

Нојбаер вели дека неговиот тим „не нашол докази“ дека патниците на Титан биле свесни за претстојната експлозија или нивната судбина.

Тој додаде дека истрагата за експлозијата на Титан е една од најкомплексните што ги направил во неговата децениска работа и дека конечниот извештај за несреќата би можел да биде завршен во следните две до три години поради „бројните компликации“.