Во затворот „Идризово“ се наоѓаа приближно 45 отсто од затворската популација во земјава. Затворот е сериозно пренатрупан, а затворениците се изложени на нечовечки и понижувачки услови. Распространетата корупција меѓу затворскиот персонал е значаен проблем во затворскиот систем. Ќелиите се слабо загреани и влажни. Дури 91 затвореник се сместени во 14 соби, од кои неколку сериозно пренатрупани. На пример, 16 лица во простор од 32 квадратни метри, пишува во најновиот извештај на американскиот Стејт департмент. Дополнително се забележува дека старата полуотворена единица на „Идризово“, која требаше да биде урната во 2018 година, сè уште функционира во затворот.

„Распаднати ѕидови, скршени прозорски рамки и мебел, опасни импровизирани електрични инсталации, без функционално вештачко осветлување, дупки на подот и таванот, бедна хигиена со наезда од штетници, купишта несобрано ѓубре во ќелиите и влага. Комуналните санитарни јазли беа во лоша состојба, тоалетите на првиот кат испуштаа смрдеа и беа покриени со фекалии, чешмите капеа, подот поплавен… Условите во оваа единица, како и оние во амбуланта, секако може да се опишат како нечовечки и понижувачки“, констатира извештајот при описот на полуотвореното одделение во „Идризово“.

Според Стејт департментот, затворските власти долго ги држат затворениците без можност за движење.

„Притворените лица продолжуваат да остануваат затворени во ќелиите повеќе од 23 часа на ден без никаква активност, освен 30-45 минути дневно во еден од двата двора, кои сè уште не се опремени со опрема за вежбање“, наведува Стејт департментот.

– Затворот во Идризово е најголемиот затвор во Македонија каде што се сместени 60 отсто од затворениците. Лоши услови има во сите затвори, но Идризово и Истражниот затвор „Скопје“ се посебен проблем. Таму не се инвестира во здравството, затворениците немаат здравствено осигурување, ниту се инвестира во образованието. Освен тортурата и високиот степен на корупција кај чуварите и управата, во извештаите за земјите во регионот не содржат олку сериозно загрижувачка слика за состојбата во затворите – рече проф. Фросина Ременски за „Утрински брифинг“.

Таа додава дека невложувањето во затворите може да создаде покриминогена средина и затвореникот кога ќе излезе од затвор нересоцијализиран, да се врати назад во затвор. Нема образование ни за малолетниците, коментира Ременски и додава дека децата затвореници се сериозен проблем, тие се под седативи, немаат рекреативно-едукативна програма.

– Кратењето на финансиските средства е една од причините за лошата состојба во затворите, како и кратењето на кадрите што би требало да работат таму. Во Идризово порано се произведуваше храна, беше самоодржлива единица, а затворениците работејќи имаа чувство на корисност. Општествената стигма на затвореник е страшна и создава проблеми потоа – вели Ременски.

Во санирањето на состојбите со затворите треба да учествуваат повеќе министерства, не само Министерството за правда, а за решавање на проблемите може да се користи и јавно-приватно партнерство, но за тоа е потребна пред сѐ волја, коментира Ременски.

Ременски: Лоши услови има во сите затвори, но Идризово и Истражниот затвор Скопје се посебен проблем