Од 1 јануари Хрватска ќе почне да ги наплаќа многу лесните пластични кеси потенки од 15 микрони, кои сè уште се достапни во продавниците во секторите за овошје и зеленчук. Исто така, на почетокот на следната година ќе се зголеми и придонесот за повратна ПЕТ-амбалажа и тоа од седум на 10 центи.

Во 2022 година, Хрватска одлучи целосно да ги забрани лесните пластични кеси со дебелина помеѓу 15 и 50 микрони, но не и да ги забрани многу лесните кеси, кои често се достапни во ролни. Од почетокот на следната година трговците ќе треба да наплаќаат и за многу лесни пластични кеси, потврди за ХРТ, Сања Радовиќ, раководител на секторот за управување со отпад во Министерството за заштита на животната средина и зелена транзиција.

Како што рече и таа, трговците ќе мора јасно да ја истакнат својата цена, а продажбата нема да биде дозволена на касите. Цената на кесите ќе ја одредуваат самите трговци. Клиентите во Хрватска сè уште можат да добијат многу лесни пластични кеси во маркетите, пекарниците и другите продавници за храна, но не и во продавниците за облека и слично. Хрватската влада планира во октомври да донесе нови прописи во оваа област, а тие ќе стапат на сила од 1 јануари.