Управата за цивилна одбрана во Газа објави дека во последните два дена повеќе од 1.540 шатори во кои се сместени раселените Палестинци се поплавени поради обилните дождови.

Спасувачките тимови констатирале дека стотици шатори останале под вода и дека нивото на водата на некои места надминувало 30 сантиметри.

Во соопштението се наведува дека поројната вода навлегла во шаторите и ги оштетила креветите и другиот привремен мебел.

Беше посочено дека вкупно 497 шатори биле потопени и оштетени во различни делови на градот Газа, 170 во Рафах, 665 во Кан Јунис и 210 во Деир Ел Белах.

Во Појасот Газа, каде Израел продолжува со нападите од 7 октомври 2023 година, седум лица, меѓу кои шест бебиња, починаа од смрзнување.

Израелската војска води геноцидна војна во Газа во која загинаа повеќе од 45.500 Палестинци од 7 октомври 2023 година, главно жени и деца, и покрај резолуцијата на Советот за безбедност на Обединетите нации која повикува на итен прекин на огнот.

Во ноември, Меѓународниот кривичен суд во Хаг издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со обвинение за геноцид пред Меѓународниот суд на правдата поради војната во Газа.