Во рамките на меѓународниот центар за современа уметност, сместен во битолското село Цапари, од 20 до 27 јуни се одржува јубилејната дваесетта ликовна колонија „Де Ниро“ – Битола.

Оваа ликовна колонија во своето дводецениско постоење не само што се здоби со една од најзначајните ликовни позиции во Македонија, туку доби солиден, авторитетен и познат углед на меѓународен план. Присуството на истакнати ликовни автори од сите континенти ја праваат оваа ликовна колонија едно од поважните творечки движења меѓу меѓународната ликовна јавност. Ликовната колонија веќе неколку години се случува во живописното село Цапари во подножјето на Пелистер.

Сопствениците, идејни творци и организатори на ова исклучително креативно и меѓународно сликарско случување Силвана и Драги Филевски успеаја не само да ја изградат во своевидна интернационална институционалност според сите стандарди и норми кои се високо рангирани, туку и да создадат галерија и збирка со огромен ликовен фонд: слики, цртежи, графики, мозаици, мурали, збирка која е меѓу најзначајните не само по бројот на делата, туку и по застапеноста на бројни истакнати автори од целиот свет.

Јубилејното издание на колонијата има „изменет“ концепт којшто, всушност, е еден вид своевидна суштинска рекапитулација на значајните движења во современиот македонски ликовен простор.

Јубилејот на ликовната колонија се совпаѓа со јубилејот на антологиската група „Зеро“, формирана пред 40 години. Нивното заедничко дејствување во рамките на ликовната колонија „Де Ниро“, оваа година е своевиден историски ексклузивитет, затоа што неконвенционалноста, бунтот, потрагата по суштинскиот творечки израз којшто беше суштествен за оваа група, сега е синтетизирана во еден голем заеднички мурал кој го работат членовите на групата во просторот на конференциската сала. Нивната заедничка коавторска тестаментална порака ја вбројува ликовната колонија „Де Ниро“ во контекстот на најзначајните ликовни пораки во историјата на македонската ликовна уметност.

Покрај заедничкиот мурал, членовите на групата индивидуално ќе создадат по две платна, со што ќе го заокружат нивниот ликовен исказ во рамките на овие два значајни јубилеи.

– Со ова меѓународната суштина на колонијата оваа година ќе биде во специфична насока – досегашното меѓународно присуство на авторите ќе биде дополнето со националното присуство и нивното дејствување во меѓународното милје. Ова премостување создава своевидна ликовна генеза која допрва ќе го добие своето ликовно вреднување – истакнуваат од ликовната колонија „Де Ниро“.

Членови на „Колектив Зеро“ се Ацо Станкоски, Беди Ибрахим, Синиша Цветковски, Перица Георгиев, Зоран Јаневски, Роберт Михајловски, Миодраг Десовски, Горанчо Ѓоргиевски, Стефан Шашков, Сашо Јовчевски, Лина Дамјан, Виктор Јаневски и Златко Трајковски (1960-2017).

Покрај големиот мурал, кој е во самиот објект, ликовната колонија располага со уште еден автентичен ликовен мурал и еден голем мозаик на повеќе од 60 квадратни метри, дело на сликарот Мирослав Масин.

Ликовната колонија „Де Ниро“ ќе трае до 27 јуни. До крајот на годината ќе следат уште активности на меѓународниот ликовен центар, кои ќе бидат од особена важност за македонската и меѓународната ликовна јавност.