Во присуство на амбасадорката на Германија, Петра Дрекслер, и амбасадорот на Франција, Сирил Бомгартнер, со полагање на венци и цвеќиња, денеска на Француските воени гробишта во Битола беше одбележан 11 ноември – Денот на примирјето од Првата светска војна.

Францускиот амбасадор Бомгартнер истакна дека во ова време што го живееме, со војната во Европа, оваа денешна комеморација во Битола има едно посебно значење.

-Станува збор за една воспоставена традиција и на овој датум 11 ноември 1918 година заеднички се одбележува примирјето помеѓу Французите и Германците, односно означувањето на крајот на Првата светска војна. На ова место се бореле голем број на армии, вклучително и Француската армија-рече амбасадорот на Франција, Сирил Бомгартнер на денешната комеморација на Француските воени гробишта во Битола.

Германската амбасадорка Петра Дрекслер истакна дека веруваат во силата на помирувањето и дека денес, помирувањето е потребно повеќе од кога и да било порано.

-Војната повторно се врати во Европа, и насекаде во светот гледаме насилство. Помирувањето е од голема важност и тоа може да започне со подавање на рака, со една заедничка соработка, особено на младите луѓе кои ќе соработуваат и ова не важи само за Франција и Германија, туку ова важи и за Европа и за Западен Балкан бидејќи има многу места каде што луѓето се жртви на војната и на насилството-рече амбасадорката на Германија, Петра Дрекслер.

На новинарско прашање какви се нејзините препораки за наредниот период по однос на извештајот на Европската комисија за Македонија германската амбасадорка Дрекслер рече дека овој извештај за земјата е многу значаен, бидејќи преку него се мери напредокот што е постигнат во различните области.

-Извештајот претставува добра основа за дискусија, добра основа за идните преговори и што е она што треба да се постигне во иднина, а тука ќе ги спомнам владеењето на правото и борбата против корупцијата-рече амбасадорката Дрекслер на денешната комеморација на Француските воени гробишта во Битола.