Вечерва во 19:00 часот, во Офицерскиот дом – Битола, ќе се одржи промоцијата на монографијата посветена на композиторот, инструменталист и диригент Кире Костов (1949–2023).

Монографијата, создадена со љубов на неговата сопруга Кармен Костова и семејството и со авторство на Снежана Анастасова Чадиковска и Марко Коловски, е сведоштво за творечкиот опус и животниот пат на маестро Костов, од првите чекори во родната Битола, преку децениската работа во Танцовиот оркестар на МРТ И ФМУ до композициите и аранжманите кои станаа дел од колективното музичко наследство на Македонија.

Монографијата е омаж на авторот на над 300 композиции, бројни џез дела и фестивалски проекти, но пред сè на човекот кој ја претвори музиката во животна мисија.

Оваа промоција е првото јавно претставување на монографијата, токму во градот каде што започна неговиот музички пат. Настанот е дел од програмата на Битфест, во организација на Културно-информативниот центар – Битола.