Општина Арачиново не водела регистар на недвижен имот и не издавала решенија за задолжување за данок на имот на физички и правни лица, немала издадено ниту едно решение за комунална такса за фирми како да нема ниту една компанија со истакнат натпис, а немала издадено ниту едно одобрение за градба, покажува извештајот на Државниот завод за ревизија за 2021 година, што беше објавен вчера.

„Непочитувањето на одредбите од Законот за комунални такси и Законот за градење, ненаплаќањето на комунална такса за фирма, комунални такси за реклами, објави и огласи, за користење на музика, надоместок за уредување на градежно земјиште има за ефект помалку остварени приходи по основ на даноци на специфични услуги во буџетот на општината“, наведува ревизорот.

Според извештајот, во 2021 година. планираните даночни приходи остварени се со само 44 проценти. Потфрлување има и на расходната страна во однос на плаќањата за струја, разни други трансфери, а за социјалната помош реализацијата е само три отсто во однос на планот за 2021 година.

Забелешки има и за собирање на приходи од давање на земјоделското земјиште во државна сопственост на користење по пат на закуп и плодоуживање. Но тука критиките се насочени кон регулативата. Ревизорот укажува дека „согласно законското решение, Општината нема сознание за висината на средствата што треба да се уплатат, ниту пак Министерството за земјоделство, шумарство и водостопанство има законска обврска склучените договори за закуп на земјоделско земјиште во државна сопственост да ги доставува до општините за земјиштето што се наоѓа на нивната територија.

Работата, според ревизорите, не е чиста ниту кај концесиите.

“И покрај тоа што Општината располага со податоци за склучените договори за концесии за детални геолошки истражувања и концесии за експлоатација на минерални суровини и има увид на уплатените средства на сметката на буџетот на Општината, нема можност да се увери во целосноста на приходите кои се уплатени на нивната сметка по овој основ.“, пишува во Извештајот на Државниот завод за ревизија.

Буџетот на општината за 2021 година бил 1,2 милиони евра, а се реализирал со 77 проценти. Државниот завод за ревизија забележува зошто во услови на ниска релаизација не е направен ребаланс на буџетот.

„Кај капиталните расходи, изградбата на други објекти е со 65 проценти реализација, додека изградбата на капацитети за водоснабдување нема реализација“, пишува во Извештајот.

Сомнителни авторски договори од по 33.000 денари месечно

Ревизорот информира дека во 2021 година, Општина Арачиново врз основа на авторски договори, односно договори на дело, има исплатено вкупно 18.600 евра. Но за овие пари ДЗР има многу забелешки.

„Дел од авторските договори се склучуваат за ангажмани кои не подразбираат креирање на авторско дело согласно член 12 од Законот за авторското право и сродните права, туку истите упатуваат на преземање на конкретни и повторливи дејствија, како што се: консултантски услуги, евиденција на податоци, ангажирање на стручни соработници и друго. Ангажирани се 7 лица, од кои 3 лица со подолг период и истите се ангажирани за консултантски услуги, кои во најголем дел се однесуваат и се поврзани со работни задачи за редовно систематизирани работни места, (консултантски услуги поврзани со менаџмент, финансии и координација со странски организации и институции, финансиски работи, одржување на системот за водоснабдување, ИТ-поддршка за следење на веб-страница и социјални мрежи и односи со јавноста). За изборот на овие лица не постојат критериуми во однос на стручните квалификации и компетенции кои би требало да ги поседуваат, ниту пак критериуми во утврдување на висината на надоместоците за извршената работа, која се движи од 8.000 до 33.000 денари месечно“, пишува во Извештајот.

Имало 4 седници, ама советниците земале пари за 12

Во текот на 2021 година, исплатени се надоместоци во износ од над 29.000 евра на сите членови на Советот на Општина Арачиново, без докази за одржани седници и присуство на сите советници.

„Општината не води евидентни листи за присуство на советниците на одржаните седници на Совет, а исплатата на надоместоците се врши без месечни списоци за исплата изготвени од страна на претседателот на Совет. Од извршениот увид во записниците за одржани седници, ревизијата констатира дека во текот на годината одржани се вкупно 4 седници, а исплатен е надоместок за 12 месеци“, извести ДЗР.

Оттаму пресметаа дека спротивно на законските одредби, за надомест на советниците повеќе се исплатени 18.000 евра. Ревизорите забележале дека состојбата се поправила, и дека „во текот на 2022 година, исплатата на надоместоците на членовите на Советот на Општина Арачиново се врши врз основа на докази за одржани седници и присуство на советниците“.

Ревизорите лоцираат и кои се градоначалниците кои ги засега извештајот: Миликије Халими е градоначалник на Општина Арачиново од 20.10.2017 година до 2.11.2021 година, а Ридван Ибраими е градоначалник од 3.11.2021 година.