Нееднаквоста се продлабочува во Африка како никаде на друго место, при што четворица милијардери сега се побогати од половина од вкупното население на континентот, се вели во извештајот објавен денес од невладината организација „Оксфам“.

Повеќе од една третина од населението на континентот – или 460 милиони луѓе – живеат под линијата на екстремна сиромаштија, според проценките на Светската банка, а бројот на сиромашни продолжува да расте.

„Денес, четирите најбогати милијардери во Африка вредат 57,4 милијарди долари, повеќе од 750 милиони луѓе, или половина од населението на континентот“, објаснува Оксфам.

Според рангирањето на списанието Форбс претходно оваа година, четирите најбогати луѓе на континентот се Алико Данготе (Нигерија: цемент, шеќер, жито, рафинерија), Јохан Руперт (Јужна Африка: луксузни стоки), Ники Опенхајмер (Јужна Африка: дијаманти) и Насеф Савирис (Египет: индустрија, градежништво).

Невладината организација нагласува дека продлабочувањето на нееднаквостите во голема мера се должи на недостатокот на политичка волја кај африканските лидери, кои ги овековечуваат даночните системи кои се особено поволни за најбогатите и се минимално ефикасни.

Луѓето со големо богатство, „кои ги пласираат своите средства во корпоративни структури и го преместуваат својот капитал во странство“, гледаат како нивното богатство „се множи“ без да бидат оданочени „како што треба“, објаснува Оксфам.

Додава дека Африка е единствениот регион во светот каде што земјите не ги зголемиле значително даночните стапки од 1980 година.

Според проценките на организацијата, доколку најбогатите граѓани на Африка бидат оданочени за 1% повеќе на нивното богатство и 10% повеќе на нивниот промет, износот што би се добил би бил доволен за финансирање на пристапот до квалитетно образование и електрична енергија за сите на континентот.

Но, африканските влади генерално се „најмалку посветени на намалување на нееднаквоста“, истакнува Оксфам.

Истражувањето на невладината организација покажа дека „повеќе од три петтини од богатството на светските милијардери доаѓа од врски, корупција , злоупотреба на монополски позиции и наследство“, што е „особено точно во Африка“.

„Богатството на Африка не се игнорира, туку се ограбува од наместен систем кој ѝ овозможува на мала елита да акумулира огромни богатства, додека стотици милиони луѓе ги лишува од најосновните услуги“, вели Фати Н’џи Хасан, директор на Оксфам за Африка, критикувајќи ја „неуспешната политика“ што се спроведува.

„Екстремните нееднаквости се закануваат да ја поткопаат демократијата, да го попречат намалувањето на сиромаштијата и развојот, да ја влошат климатската криза, да ги влошат родовите нееднаквости и другите неправди“ и „да доведат до лишување од основните права и достоинството на обичните граѓани“, вели невладината организација.

Извештајот се објавува на денот кога започнува полугодишниот самит на Африканската унија, која вети дека ќе ги намали нееднаквостите за 15% во текот на следната деценија.